බ්රසීලයෙන් ආනයනය කරනු ලබන මස් වර්ග ඇතුළු ආහාර නිෂ්පාදන ලබන සැප්තැම්බර් 03 වන දින සිට තහනම් කිරීමට යුරෝපා සංගමය (EU) තීරණය කර තිබේ. සත්ත්ව වර්ධනය උත්තේජනය කිරීම සඳහා ප්රතිජීවක (Antimicrobials) භාවිත කිරීම සම්බන්ධයෙන් පවතින සෞඛ්යාරක්ෂිත ගැටලු මෙයට ප්රධාන හේතුව වී ඇත.
යුරෝපා සංගමයේ සාමාජික රටවල විශේෂඥයින්ගෙන් සමන්විත කමිටුවක් විසින් පසුගිය අඟහරුවාදා ඒකමතිකව මෙම තීරණය ගනු ලැබීය. ඒ අනුව බ්රසීලය, යුරෝපා සංගමයේ ආහාර සුරක්ෂිතතා ප්රමිතීන්ට අනුකූල රටවල් ලැයිස්තුවෙන් ඉවත් කර ඇති පළමු රට බවට පත්වේ. සැප්තැම්බර් 03 වනදා සිට ගව මස්, කුකුළු මස්, අශ්ව මස්, බිත්තර, මී පැණි සහ ජලජීවී නිෂ්පාදන යුරෝපා සංගමයට අපනයනය කිරීමට බ්රසීලයට නොහැකි වනු ඇත.
මෙම තහනම පනවනු ලබන්නේ යුරෝපා සංගමය සහ මර්කෝසර් (Mercosur) රටවල් (බ්රසීලය, ආර්ජන්ටිනාව, පැරගුවේ සහ උරුගුවේ) අතර නිදහස් වෙළඳ ගිවිසුම මැයි 01 වනදා සිට තාවකාලිකව බලාත්මක වී සති දෙකක් ගතවීමටත් පෙරය. යුරෝපා සංගමයේ ගොවීන් මෙම ගිවිසුමට දැඩි ලෙස විරුද්ධ වන්නේ ලතින් ඇමරිකානු රටවල පවතින ලිහිල් නිෂ්පාදන ප්රමිතීන් නිසා තමන්ට අසාධාරණ තරඟයකට මුහුණ දීමට සිදුවන බව පවසමිනි.
කෙසේ වෙතත් යුරෝපා කොමිසම අවධාරණය කරන්නේ වෙළඳ ගිවිසුම් මඟින් කලාපයේ පවතින සෞඛ්යාරක්ෂිත ප්රමිතීන් වෙනස් නොවන බවයි. බ්රසීලය නැවතත් මෙම ප්රමිතීන් සපුරාලීමට සමත් වූ පසු, ඔවුන්ට යළිත් මස් ආනයනය කිරීමට අවසර ලැබෙනු ඇත.
