චීනය ඇතුළු ලොව ප්රධාන පෙළේ ආර්ථිකයන් සතු “අසාධාරණ සහ උචිත නොවන” වෙළඳ පිළිවෙත්වලට (Unfair Trade Practices) ප්රබල ප්රතිප්රහාර එල්ල කිරීම සඳහා තීරු බදු සහ අනෙකුත් වෙළඳ ආරක්ෂණ ක්රියාමාර්ග වඩාත් පුළුල් මෙන්ම දැඩි ලෙස භාවිත කරන ලෙස ප්රංශය ප්රමුඛ යුරෝපා සංගමයේ (EU) බලවත් රටවල් පහක් යුරෝපා කොමිසමෙන් (European Commission) හදිසි ඉල්ලීමක් කර තිබේ.
ලෝක ප්රකට ‘POLITICO’ පුවත්පත නිල වශයෙන් වාර්තා කර ඇති පරිදි, ප්රංශය, ඉතාලිය, ස්පාඤ්ඤය, නෙදර්ලන්තය සහ ලිතුවේනියාව යන රටවල් පහ එක්ව සකස් කරන ලද ඒකාබද්ධ රහසිගත නිල නොවන වාර්තාවක් (Non-paper) හරහා යුරෝපා සංගමයෙන් ඉල්ලා ඇත්තේ, යුරෝපීය වෙළඳපොළ ආක්රමණය කරන විදේශීය නිෂ්පාදන පිළිබඳව නිතර නිතර විමර්ශන පවත්වන ලෙසයි. යුරෝපා කොමිසම සහ අනෙකුත් සාමාජික රටවල් වෙත නිල වශයෙන් භාර දී ඇති මෙම ලේඛනය මඟින්, යුරෝපයේ ආර්ථිකය ආරක්ෂා කරගැනීම වෙනුවෙන් නව වෙළඳ ආරක්ෂණ මෙවලම් (New Trade Defense Instruments) වහාම නිර්මාණය කළ යුතු බවට ද යෝජනා කර ඇත.
යුරෝපා කොමිසම විසින් චීනයට එරෙහිව වඩාත් දැඩි සහ ඵලදායී වෙළඳ ආරක්ෂණ ප්රතිපත්තියක් සකස් කරමින් සිටින උපායමාර්ගික මොහොතක මෙම ලේඛනය නිකුත් වීම විශේෂත්වයක් වන අතර, චීනයෙන් එල්ල වන මෙම බරපතළ තරඟකාරී තර්ජන පිළිබඳව විශේෂ අභ්යන්තර සාකච්ඡාවක් ලබන සිකුරාදා පැවැත්වීමට ද යුරෝපා සංගමය සැලසුම් කර තිබේ. මෙම ලේඛනය තුළ ‘චීනය’ යන නම ඍජුවම සඳහන් කර නොතිබුණ ද, යුරෝපා සංගමයේ ප්රධාන වෙළඳ හවුල්කරුවන් කිහිපදෙනෙකු නව වෙළඳ බාධක පැනවීම හෝ පද්ධතිමය සහ ව්යුහාත්මක කාර්මික අතිරික්ත නිෂ්පාදනය (Industrial Overcapacity) මඟින් බහුපාර්ශ්වීය වෙළඳ රාමුව සිතාමතා බිඳ දමමින් සිටින බව අවධාරණය කරමින් වක්රව චීනය වෙත දැඩි ලෙස ඇඟිල්ල දිගු කර ඇත.
ජර්මනිය හැරුණු විට යුරෝපා සංගමයේ විශාලතම ආර්ථිකයන් හිමි සෙසු සියලුම රටවල් මෙම ලේඛනයට අත්සන් තබා තිබීම කැපීපෙනෙන කරුණකි. යම් ක්ෂේත්රයක වෙළඳ කඩාකප්පල් වීම් සිදුවන සෑම අවස්ථාවකදීම වහාම ආරක්ෂණ පරීක්ෂණ ආරම්භ කළ යුතු බවත්, ලෝක වෙළඳ සංවිධානය (WTO) හමුවට වෙළඳ නීති උල්ලංඝනය කිරීම් රැගෙන යාමේදී යුරෝපා සංගමය මීට වඩා ක්රියාශීලී විය යුතු බවත් ඔවුහු පෙන්වා දෙති.
