පිරිසිදු බලශක්ති ප්රභවයන් (Clean Power) භාවිත කිරීම හේතුවෙන් මෙරට වසරේදී යුරෝපා සංගමයට අයත් රටවල් පහක පාරිභෝගිකයන්ට සිය බලශක්ති බිල්පත්වලින් යුරෝ බිලියන 8.5ක් දක්වා ඉතිරි කර ගැනීමට අවස්ථාව ලැබී තිබේ. ඉරානය සමඟ පවතින යුදමය වාතාවරණය හමුවේ පොසිල ඉන්ධන මත යැපීමේ අවදානම ඉහළ ගොස් ඇති පසුබිමක මෙම තත්ත්වය වාර්තා වේ.
මැදපෙරදිග කලාපයේ පවතින ගැටුම්කාරී තත්ත්වය හේතුවෙන් යුරෝපයේ තොග ගෑස් මිල (Dutch TTF) 68%කින් පමණ ඉහළ ගොස් ඇති අතර, එය මෙගාවොට් පැයකට යුරෝ 52.8ක් දක්වා වාර්තාගත ලෙස ඉහළ ගියේය. සති දෙකක සටන් විරාමයත් සමඟ මිල යම් මට්ටමකට පහළ බැස තිබුණද, එය තවමත් යුද්ධයට පෙර පැවති මිලට වඩා බෙහෙවින් ඉහළ මට්ටමක පවතී.
ගෝලීය තෙල් සහ ගෑස් සැපයුමෙන් පහෙන් එකක් රැගෙන යන හෝමුස් සමුද්ර සන්ධිය (Strait of Hormuz) කෙරෙහි පවතින බලපෑම හේතුවෙන් මාර්තු මාසයේදී යුරෝපයට ලැබෙන ස්වාභාවික වායු (LNG) අපනයනය 11%කින් පහත වැටී තිබේ. මෙම අස්ථාවරත්වය හමුවේ මිල ඉහළ යාමේ පීඩනය අවම කර ගැනීම සඳහා තොග ගබඩා කර ගන්නා ලෙස යුරෝපා බලශක්ති කොමසාරිස්වරයා රටවලට නිර්දේශ කර ඇත.
භූදේශපාලනික ආතතීන් හමුවේ හිරු එළියට හෝ සුළඟට කිසිදු සම්බාධකයක් පැනවිය නොහැකි බවත්, එම නිසා දේශීය පුනර්ජනනීය බලශක්තිය වඩාත් ස්ථාවර ආයෝජනයක් බවත් එක්සත් ජාතීන්ගේ මහලේකම් ඇන්ටෝනියෝ ගුටරෙස් මහතා පසුගියදා අවධාරණය කළේය. පිරිසිදු බලශක්තිය වැඩි වශයෙන් භාවිත කරන රටවලට මෙම ඉන්ධන මිල ඉහළ යාමේ බලපෑම අවම කර ගැනීමට හැකි වී තිබේ.
