2026 වසරේ පළමු කාර්තුව සඳහා සුරාබදු දෙපාර්තමේන්තුවට ලබා දී තිබූ ආදායම් ඉලක්කය රුපියල් බිලියන 61.95ක් වූ අතර, ලබාගත් ආදායම එම ඉලක්කයට සාපේක්ෂව 113.6%ක ඉහළ අගයකි. මෙය 2025 වර්ෂයේ පළමු කාර්තුවේ ආදායම හා සැසඳීමේදී 114.8%ක සැලකිය යුතු ප්රගතියක් බව සුරාබදු කොමසාරිස් ජනරාල් එම්.බී.එන්.ඒ. පේමරත්න මහතා ප්රකාශ කර සිටියි. නව රජයේ නිසි මඟපෙන්වීම සහ සියලුම ශ්රේණිවල සුරාබදු නිලධාරීන්ගේ කැපවීම මෙම සාර්ථකත්වයට මූලික හේතුව වී තිබේ.
ආදායම් වර්ධනය සඳහා බලපෑ ප්රධාන උපායමාර්ග පිළිබඳව අදහස් දැක්වූ සුරාබදු කොමසාරිස් ජනරාල්වරයා සඳහන් කළේ, මත්පැන් නිෂ්පාදනාගාර සහ ස්කාගාර නිරන්තර අධීක්ෂණයට ලක් කිරීම මෙන්ම මත්පැන් බෝතල් මත ආරක්ෂිත මුද්රා සලකුණු (ස්ටිකරය) යෙදීම විධිමත් කිරීම මෙහිදී බෙහෙවින් ඉවහල් වූ බවයි. මීට අමතරව, නීතිවිරෝධී මත්පැන් වැටලීම් තීව්ර කිරීම සහ බලපත්රලාභී ස්ථාන පරීක්ෂා කර නීතිය දැඩිව ක්රියාත්මක කිරීම හරහා රජයට ලැබිය යුතු ආදායම සුරක්ෂිත කිරීමට පියවර ගෙන ඇත.
රාජ්ය ආදායම් උපයන ආයතන අතර තෙවැනි ස්ථානය හිමි කරගෙන සිටින සුරාබදු දෙපාර්තමේන්තුව, සිය ඉලක්කගත ආදායම් සපුරා ගැනීම හරහා රටේ ආර්ථිකය ස්ථාවර කිරීමට සුවිශේෂී දායකත්වයක් ලබා දෙන බව ද හෙතෙම වැඩිදුරටත් පැවසීය. 2026 වසරේ ඉදිරි මාසවලදී ද මෙම ප්රගතිය පවත්වාගෙන යාමට අවශ්ය සැලසුම් දැනටමත් සකස් කර ඇති බව වාර්තා වේ.
