ප්රංශයේ ආර්ථික වර්ධනය මේ වසරේදී අපේක්ෂා කළ මට්ටමට වඩා මන්දගාමී වනු ඇතැයි ප්රංශ මහ බැංකුව පුරෝකථනය කර තිබේ.
ඒ අනුව, 2026 වසර සඳහා එරට ආර්ථික වර්ධන පුරෝකථනය 0.5% සිට 0.4% දක්වා පහළ දැමීමට ප්රංශ මහ බැංකුව පියවර ගෙන ඇත.
යුරෝ කලාපයේ දෙවැනි විශාලතම ආර්ථිකය වන ප්රංශයේ වසරේ පළමු භාගයේ ආර්ථික ක්රියාකාරකම් එකතැන පල්වීම මෙම සංශෝධනයට බලපා ඇති බව රොයිටර්ස් වාර්තා කරයි.
පාරිභෝගිකයින් වියදම් සීමා කිරීම සහ ව්යාපාරිකයන් ආයෝජන කටයුතු කල් දැමීම හේතුවෙන් දේශීය ඉල්ලුමට දැඩි බලපෑමක් එල්ල වී තිබේ.
බලශක්ති මිල, රාජ්ය මූල්ය තත්ත්වය සහ භූ දේශපාලනික ආතතීන් සම්බන්ධයෙන් පවතින අවිනිශ්චිතතාව හේතුවෙන් පාරිභෝගික හා ව්යාපාරික විශ්වාසය දුර්වල වී ඇති බව මහ බැංකුව පෙන්වා දෙයි.
එමෙන්ම, ඉහළ පොලී අනුපාත හේතුවෙන් මූල්ය පහසුකම් ලබා ගැනීම වඩාත් අපහසු වීමද දේශීය ඉල්ලුමට බලපා ඇති බව සඳහන් වේ.
ගෝලීය වෙළෙඳාම තවදුරටත් ශක්තිමත්ව පැවතීම හේතුවෙන් ප්රංශ අපනයන සඳහා යම් සහයක් ලැබුණද, එය දේශීය ඉල්ලුමේ දුර්වලතාව සම්පූර්ණයෙන්ම පියවා ගැනීමට ප්රමාණවත් නොවන බව මහ බැංකුවේ නවතම පුරෝකථනය පෙන්වා දෙයි.
මේ අතර, බලශක්ති මිල ඉහළ යාමෙන් ඇතිවන උද්ධමන බලපෑම හේතුවෙන් මෙම වසරේදී ප්රංශ ජනතාවගේ මිලදී ගැනීමේ හැකියාව අඩුවනු ඇතැයිද මහ බැංකුව අපේක්ෂා කරයි.
කෙසේ වෙතත්, 2027 සහ 2028 වසරවලදී මිලදී ගැනීමේ හැකියාව යළි වර්ධනය වනු ඇතැයි පුරෝකථනය කර ඇති අතර, 2027 සිට උද්ධමනය 2%ට වඩා පහළ මට්ටමකට පැමිණෙනු ඇතැයිද අපේක්ෂා කෙරේ.
