ඉන්ධන නිකුත් කිරීම සඳහා දැනට පවතින QR ක්රමවේදය ඉවත් කිරීමට මේ මොහොතේ කිසිදු සූදානමක් නොමැති බව ඛනිජ තෙල් නීතිගත සංස්ථාව පවසයි.
ලෝක වෙළෙඳපොළේ ඉන්ධන මිලෙහි පවතින අස්ථාවරත්වය සහ නැවත මතුවිය හැකි යුදමය තත්ත්වයන් හේතුවෙන් ඉන්ධන පෝලිම් ඇතිවීම වැළැක්වීමට මෙම පියවර අත්යවශ්ය බව සංස්ථාවේ කළමනාකරණ අධ්යක්ෂ මයුර නෙත්තිකුමාරගේ මහතා සඳහන් කළේය. QR ක්රමවේදය හරහා ඉන්ධන භාවිතය මෙන්ම ඩොලර් සංචිත ද නිසි ලෙස පාලනය කළ හැකි බව ඔහු පෙන්වා දුන්නේය.
කෙසේ වෙතත්, මේ දක්වා පවතින යුදමය තත්ත්වයන් හේතුවෙන් මෙරට ඉන්ධන සැපයුම් ජාලයට කිසිදු බලපෑමක් එල්ල වී නොමැති අතර, ඉන්ධන මිල ගණන් ඉහළ යාමේ හැකියාව පිළිබඳව සංස්ථාව නිරන්තරයෙන් නිරීක්ෂණය කරමින් සිටින බව ද ඔහු වැඩිදුරටත් පැවසීය.
