පාස්කු ප්රහාරය සම්බන්ධයෙන් චෝදනා ලබා සිටින මොහොමඩ් ඊබ්රාහිම්ට එරෙහි නඩුවේ ප්රධානතම සාක්ෂිකාරිය මෙරටින් පිටව ගොස් ඇති බවත්, ඒ හරහා ඔහුට නඩුවෙන් නිදහස් වීමේ අවස්ථාවක් උදාවී ඇති බවත් පිවිතුරු හෙළ උරුමයේ නායක උදය ගම්මන්පිල මහතා පවසයි. ඔහු මේ බව සඳහන් කළේ අද (15) පැවති මාධ්ය හමුවකදීය.
නීතිපතිවරයා විසින් ඊබ්රාහිම්ට එරෙහිව නඩු පවරා තිබුණේ ත්රස්තවාදී ප්රහාරයක් පිළිබඳ තොරතුරු දැනගෙන වසන් කිරීම සහ ත්රස්තවාදයට අනුබල දීම යන චෝදනා යටතේය. මෙම නඩුවේ ප්රධානම සාක්ෂිකාරිය ලෙස නම් කර තිබුණේ ඔහුගේ නිවසේ සේවිකාව ලෙස කටයුතු කළ කාන්තාවයි. කෙසේ වෙතත්, නඩුව කැඳවූ අවස්ථාවේදී අදාළ සාක්ෂිකාරිය විදේශ රැකියාවකට ගොස් ඇති බව නීතිපතිවරයා විසින් අධිකරණයට දැනුම් දී තිබේ.
මෙම සාක්ෂිකාරිය විදේශගත වීම හරහා ඊබ්රාහිම්ට චෝදනාවලින් නිදහස් වී එළියට ඒමට මඟ පෑදී ඇති බව ගම්මන්පිල මහතා පෙන්වා දෙයි. පාස්කු ප්රහාරය සඳහා ඊබ්රාහිම්ගේ පුතුන් දෙදෙනා, ලේලිය සහ මුණුබුරන් දෙදෙනා මිය ගියද, පසුගිය රජය ඔහුට කිසිදු දේශපාලන සැලකීමක් නොකළ බවත්, වත්මන් මාලිමා රජය ඔහුට දේපළ නැවත භාරදීම වැනි ක්රියාමාර්ග ඔස්සේ “කළගුණ සලකමින්” සිටින බවත් ඔහු වැඩිදුරටත් චෝදනා කරයි.එමෙන්ම, ඉතිහාසයේ ප්රථම වතාවට රහස් පොලිස් විමර්ශනයක ප්රධාන සැකකරුවෙකු එම දෙපාර්තමේන්තුවේ අධ්යක්ෂ ධුරයටත්, තවත් සැකකරුවෙකු පොලිසිය භාර අමාත්යාංශයේ ලේකම් ධුරයටත් පත් කර ඇති බව ගම්මන්පිල මහතා පෙන්වා දෙයි. ස්වාධීන විමර්ශනයක් වෙනුවට සැකකරුවන් ලවාම විමර්ශන සිදු කිරීමට කාදිනල් හිමිපාණන්ට අවශ්ය වූයේ මන්දැයි යන්න ජනතාවට පිළිතුරු දිය යුතු ප්රශ්නයක් බව හෙතෙම අවධාරණය කළේය.
