මෙරට තවත් ස්ථානයක පිපිරීමක් සිදුවූ පසු නැවත වරක් මහමොළකරුවන් සෙවීමට බලධාරීන් කටයුතු කරන්නේ දැයි පූජ්ය ගලගොඩඅත්තේ ඥානසාර හිමියෝ ප්රශ්න කර සිටිති. ලෝකයේ වෙනත් රටවල මෙවැනි ත්රස්ත සිදුවීම් හමුවේ කිසිදු ආගමික කණ්ඩායමක් හෝ කතෝලික සභාව මැදිහත්වී මහමොළකරුවන් සෙවීමට කටයුතු කරනු තමන් දැක නැති බව උන්වහන්සේ පෙන්වා දෙති.
ප්රහාරයන් සම්බන්ධයෙන් සැකයක් පවතී නම් නෛතික ක්රමවේදයන්ට අනුව පරීක්ෂණ සිදුකළ යුතු බව තමන් පිළිගන්නා බවත්, නමුත් තමන් රට හමුවේ පෙන්වා දෙන ගැඹුරු න්යායාත්මක සහ සත්ය කරුණු කෙරෙහි වගකිවයුතු කිසිදු නිලධාරියෙකු උනන්දු නොවීම බරපතළ අවාසනාවන්ත තත්ත්වයක් බවත් උන්වහන්සේ අවධාරණය කළහ.
එහිදී වැඩිදුරටත් අදහස් දැක්වූ ඥානසාර හිමියන් පෙන්වා දුන්නේ සහරාන් හෂීම් වැනි අය බිහි කළ මතවාදී සහ න්යායාත්මක ගුරුකුලය කිසිදු බාධාවකින් තොරව අදටත් සමාජය තුළ නිදහසේ දේශන පවත්වන බවයි. දශක කිහිපයකට නොපැවති ආකාරයෙන් ඉස්ලාම්වාදී මතවාදයන් රාජ්ය දේහය තුළ වර්ධනය වෙමින් පැවතීම රටේ අනාගතය අඳුරු කරන ඛේදවාචකයක් බව උන්වහන්සේ සඳහන් කළහ. හජ්ජුල් අක්බර් වැනි පුද්ගලයන් අදටත් ප්රසිද්ධියේ දේශන පවත්වන බවත්, පුත්තලම සහ මාවැල්ල වැනි ප්රදේශවල දරුවන් ඉලක්ක කර ගනිමින් ඉජ්තිමා වැඩමුළු සංවිධානය කර ඇති බවත්, සහරාන්ලා ද මුලින් වර්ධනය වූයේ මෙවැනි පසුබිමක බවත් උන්වහන්සේ සිහිපත් කළහ. එසේම රටේ ආරක්ෂක තත්ත්වය පිළිබඳව ජනාධිපති, අගමැති, කථානායක සහ ආරක්ෂක ලේකම්වරයා වෙත ලිඛිතව දැනුම් දී සාකච්ඡාවක් ඉල්ලා සිටිය ද, අද වන තෙක් බලධාරීන් කිසිවෙකුගෙන් ඊට පිළිතුරක් ලැබී නොමැති බව උන්වහන්සේ වැඩිදුරටත් පැවසූහ.
