පාස්කු ප්රහාරයේ ‘මහමොළකරු’ ලෙස සැකපිට ප්රශ්න කිරීම සඳහා තමන් අත්අඩංගුවට පත්විය හැකි බවට සමාජ මාධ්ය තුළ රාවයක් පැතිර පවතින පසුබිමක, හිටපු ජනාධිපති ගෝඨාභය රාජපක්ෂ මහතා අද (12) උදෑසන ඓතිහාසික කතරගම කිරිවෙහෙර රාජමහා විහාරස්ථානය වෙත ගොස් ආගමික වතාවත්වල නිරත විය.
විහාරාධිපති පූජ්ය කොබවක ධම්මින්ද නාහිමිපාණන් වහන්සේ බැහැදැක ආශිර්වාද ලබාගත් හිටපු ජනාධිපතිවරයා, පසුව කිරිවෙහෙර සෑ රදුන් අභියස විශේෂ පූජාවක් පවත්වා මහසෙන් දෙවියන්ගේ සහ දැඩිමුණ්ඩ දෙවියන්ගේ ආශිර්වාදය ලබා ගත්තේය. මෙම අවස්ථාව සඳහා ඔහුගේ බිරිඳ ද එක්ව සිටි අතර, අෂ්ඨඵල රුහ බෝධීන් වහන්සේ වැඳ පුදා ගැනීමෙන් අනතුරුව ඔවුන් ආශිර්වාද ලබා ගත් බව වාර්තා වේ.
පවතින දේශපාලනික සහ නීතිමය තත්ත්වය හමුවේ රාජපක්ෂ මහතාගේ මුහුණේ දැඩි බියක් සහ ආතතියක් පෙන්නුම් කළ බව සමාජ මාධ්ය පරිශීලකයින් විසින් අදහස් දක්වා තිබේ.
