රජයේ පූර්ණ අනුග්රාහකත්වය ඇතිව සංවිධානය කරනු ලබන “සාම පාගමන” සඳහා සහභාගී වන භික්ෂූන් වහන්සේලා කණ්ඩායම අද (අප්රේල් 17) උදෑසන කටුනායක ගුවන් තොටුපළින් දිවයිනට වැඩම කළහ. තුර්කියේ ඉස්තාම්බුල් නුවර සිට පැමිණි මෙම භික්ෂූන් වහන්සේලා කණ්ඩායම ලබන අප්රේල් 21 වනදා සිට 28 වනදා දක්වා අනුරාධපුරයේ සිට කොළඹ නිදහස් චතුරශ්රය දක්වා පැවැත්වෙන මෙම විශේෂ සාම පාගමනට වැඩම කිරීමට නියමිතය.
අතිපූජ්ය පඤ්ඤාකර ස්වාමීන් වහන්සේ ඇතුළු මහා සංඝ රත්නය අනුරාධපුර ජය ශ්රී මහා බෝධීන් වහන්සේගෙන් ලබාගත් බෝධි අංකුරයක් ද සහිතව මෙම පාගමනේ වැඩම කරනු ලබයි. ජනාධිපති ලේකම් කාර්යාලය, බුද්ධ ශාසන අමාත්යාංශය, ත්රිවිධ හමුදාව, පොලීසිය සහ ‘Clean Sri Lanka’ වැඩසටහන ඇතුළු රාජ්ය හා පෞද්ගලික ආයතන රැසක සහයෝගය මත මෙම වැඩසටහන ක්රියාත්මක වේ. සාමය ප්රවර්ධනය කිරීමට අමතරව, මෙරට බෞද්ධ උරුමයන් සහ සාම්ප්රදායික කලා ශිල්ප ජනතාව අතරට ගෙන යාම ද මෙහි තවත් එක් අරමුණක් ලෙස සඳහන් වේ.
