ක්‍රොඒෂියාවේ ස්ප්ලිට් නගරයේ පැවති හජ්ඩුක් ස්ප්ලිට් සහ නෙදර්ලන්තයේ අජැක්ස් කණ්ඩායම් අතර පාපන්දු තරගයට පෙර නාසිවාදය අගය කරන සටන් පාඨ සහ යුදෙව් විරෝධී ප්‍රකාශ සිදුකළ බවට චෝදනා එල්ල වූ හජ්ඩුක් ස්ප්ලිට් පාපන්දු ලෝලීන් 12 දෙනෙකු පොලිසිය විසින් අත්අඩංගුවට ගෙන තිබේ.
විදෙස් මාධ්‍ය වාර්තාවලට අනුව, බ්‍රහස්පතින්දා පැවති තරගයට පෙර දහස් ගණනක් වූ ක්‍රීඩා ලෝලීන් පිරිසක් පෙළපාළියක ගමන් කරමින් යුදෙව් ජනතාවට එරෙහි අපහාසාත්මක ප්‍රකාශ සිදුකර ඇති අතර, නාසි ජර්මනියේ නායක ඇඩොල්ෆ් හිට්ලර්ට ප්‍රශංසා කරන සටන් පාඨ ද හඬ නඟා තිබේ. අජැක්ස් කණ්ඩායමේ නම සඳහන් කළ මිනී පෙට්ටියක අනුරුවක් රැගත් වාහනයක් ද පෙළපාළියේ තිබූ බව වාර්තා වේ.
පොලිසිය සඳහන් කර ඇත්තේ ප්‍රචණ්ඩත්වය සහ වෛරය උසිගැන්වීමේ චෝදනා මත සිකුරාදා මෙම අත්අඩංගුවට ගැනීම් සිදුකළ බවයි. තවත් සැකකරුවන් අත්අඩංගුවට ගැනීමට ඉඩ ඇති බව ද පොලිසිය පවසා තිබේ.
තරගය අතරතුර ක්‍රීඩා ලෝලීන් පිරිසක් ගිනිදැල් සහ වෙනත් වස්තූන් පිටියට විසි කිරීමත් සමඟ පොලිසිය සමඟ ගැටුම් ඇතිවී තිබේ. ඒ හේතුවෙන් තරගය මිනිත්තු 12ක පමණ කාලයක් නතර කිරීමට සිදුවිය.
කෙසේ වෙතත්, තරගය අවසානයේ හජ්ඩුක් ස්ප්ලිට් කණ්ඩායම ගෝල 2-1කින් අජැක්ස් කණ්ඩායම පරාජය කළේය.
සිද්ධිය සම්බන්ධයෙන් ක්‍රොඒෂියානු පාපන්දු සංගමය සිය කනස්සල්ල පළ කරමින්, එවැනි හැසිරීම් ක්‍රීඩාවේ අන්‍යෝන්‍ය ගෞරවය, ඉවසීම සහ එකමුතුකම යන මූලික වටිනාකම්වලට පටහැනි බව සඳහන් කර තිබේ. ක්‍රොඒෂියානු ජනාධිපති සොරන් මිලානොවිච් ද නාසිවාදය උත්කර්ෂයට නැංවීමට රට තුළ ඉඩක් නොතිබිය යුතු බව අවධාරණය කර ඇත.
