අග්රාමාත්ය ආචාර්ය හරිනි අමරසූරිය මහත්මියගේ නිල භූතාන සංචාරය අතරතුර, එරට අග්රාමාත්ය කාර්යාලය සහ එක්සත් ජාතීන්ගේ සංවර්ධන වැඩසටහන ඒකාබද්ධව ක්රියාත්මක කරන භූතාන නවෝත්පාදන විද්යාගාරයේ (BIL) නියෝජිතයන් හමුවී විශේෂ සාකච්ඡාවක නිරතවී තිබේ. නවෝත්පාදන, ව්යවසායකත්වය සහ තාක්ෂණය උපයෝගී කරගනිමින් රාජ්ය පාලන ක්රමවේද පරිවර්තනය කිරීමට සහ ආර්ථික සංවර්ධනය වේගවත් කිරීමට අපේක්ෂිත මෙම වැඩසටහන හරහා රාජ්ය ප්රතිපත්ති සමඟ නව අදහස් ප්රායෝගික මට්ටමින් සංවර්ධනය කිරීම කෙරෙහි මෙහිදී විශේෂ අවධානය යොමු කර ඇත.
භූතාන අග්රාමාත්යවරයාගේ සෘජු මෙහෙයවීම යටතේ ක්රියාත්මක වන මෙම නවෝත්පාදන විද්යාගාරය මඟින් එරට ආර්ථික මාර්ග සිතියම ක්රියාත්මක කිරීම සහ ඩිජිටල් විසඳුම් හරහා රාජ්ය සේවා කාර්යක්ෂම කිරීම සඳහා ලබාදෙන දායකත්වය දෙපාර්ශ්වයේම දැඩි ඇගැයීමට ලක්විය. ශ්රී ලංකාව තුළ අග්රාමාත්ය කාර්යාලය සහ එක්සත් ජාතීන්ගේ සංවර්ධන වැඩසටහන එක්ව ක්රියාත්මක වන සිත්රා සමාජ නවෝත්පාදන පර්යේෂණාගාරය හරහා අත්පත් කරගෙන ඇති අත්දැකීම් ද මෙහිදී ශ්රී ලාංකික දූත පිරිස විසින් භූතාන නියෝජිතයන් සමඟ සාකච්ඡා කර ඇති අතර, දෙරට අතර ආර්ථික පරිවර්තනය සහ තරුණ ව්යවසායකයන් සඳහා නව අවස්ථා නිර්මාණය කිරීමේ අරමුණින් අදහස් හුවමාරු කරගෙන තිබේ.
මෙම අන්යෝන්ය අත්දැකීම් හුවමාරු කර ගැනීම මඟින් දෙරටේ රාජ්ය අංශයේ නවෝත්පාදන ක්රියාවලි වඩාත් ශක්තිමත් කර ගැනීමට මෙන්ම සංවර්ධන හවුල්කරුවන් සමඟ වන සහයෝගීතාව පුළුල් කර ගැනීමට කලාපීය වශයෙන් කදිම මාවතක් විවර වනු ඇත. ඉදිරියේදී නව තාක්ෂණික මෙවලම් සහ ඩිජිටල් විසඳුම් රාජ්ය පාලනයට පුළුල් ලෙස සම්බන්ධ කරගැනීම සඳහා මෙම හමුව මඟින් දෙරටටම නව ප්රවේශයක් ලැබෙනු ඇති බවට අපේක්ෂිතය.
