නූතන සමාජ හා තාක්ෂණික අභියෝග හමුවේ දරුවන්ගේ චිත්තවේගීය ආරක්ෂාව, මානසික යහපැවැත්ම සහ ආත්ම විශ්වාසය තහවුරු කිරීම ඉතා වැදගත් බවත්, ඒ සඳහා රජය ප්‍රමුඛතාව ලබාදී ඇති බවත් අග්‍රාමාත්‍ය ආචාර්ය හරිනි අමරසූරිය මහත්මිය පවසයි.
ළමා දින ජාතික සැමරුම් උත්සවයට එක්වෙමින් අග්‍රාමාත්‍යවරිය මේ බව සඳහන් කර තිබේ.
ඩිජිටල් තාක්ෂණය සහ කෘත්‍රිම බුද්ධියෙන් අධ්‍යාපනයට ලැබෙන ප්‍රතිලාභ ලබාගන්නා අතරම, සයිබර් හිරිහැර සහ නොමඟ යවන අන්තර්ගතයන්ගෙන් දරුවන් ආරක්ෂා කිරීම සඳහා අවශ්‍ය නීතිමය හා ආරක්ෂක රාමු ශක්තිමත් කිරීමට පියවර ගනිමින් සිටින බවද ඇය ප්‍රකාශ කළාය.
එමෙන්ම දරුවන්ට එරෙහි ශාරීරික දඬුවම් සහ මානසික හිංසනය වැළැක්වීම, දරුවන්ගේ ගෞරවය ආරක්ෂා වන විනය ක්‍රම ප්‍රවර්ධනය කිරීම සහ පෙරපාසල් අධ්‍යාපනය සඳහා ජාතික ප්‍රමිතියක් හඳුන්වාදීම සම්බන්ධයෙන්ද රජය කටයුතු කරමින් සිටින බව අග්‍රාමාත්‍යවරිය සඳහන් කළාය.
සෑම දරුවෙකුටම භාෂා, ආගම හෝ ප්‍රදේශ භේදයකින් තොරව ආරක්ෂිතව සහ ආත්ම විශ්වාසයෙන් ජීවත්වීමේ අයිතිය තහවුරු කළ යුතු බවද ඇය අවධාරණය කර තිබේ. ඒ සඳහා මව්පියන්, ගුරුවරුන් සහ සමස්ත සමාජයේම සහභාගීත්වය අවශ්‍ය බවද අග්‍රාමාත්‍යවරිය පෙන්වා දී ඇත.
