නීත්යානුකූලව පැවැත්විය යුතු සහ පැවැත්විය හැකි සියලුම මැතිවරණ ඉදිරියේදී පවත්වන බවත්, කිසිදු මැතිවරණයක් නොපවත්වා සිටීමට රජය තීරණය කර නොමැති බවත් අගමැතිනි හරිනි අමරසූරිය මෙනවිය ඊයේ (10) පාර්ලිමේන්තුවේදී අවධාරණය කළාය. ගතවූ වසර එකහමාරක කාලය තුළ වත්මන් රජය මැතිවරණ දෙකක් සාර්ථකව පවත්වා ඇති බැවින් රජය මැතිවරණවලට බිය නොමැති බව ද ඇය සඳහන් කළාය. පාර්ලිමේන්තු මන්ත්රී රවී කරුණානායක මහතා යොමුකළ ප්රශ්නයකට පිළිතුරු දෙමින් අගමැතිනිය මේ බව ප්රකාශ කළාය.
පළාත් සභා මැතිවරණය පැවැත්වීමේ ප්රකාශිත ප්රමාදය පිළිබඳව කරුණු පැහැදිලි කළ අගමැතිනිය, එක් එක් පළාත් සභාවල කාල සීමාවන් විවිධ දිනවලදී අවසන් වී ඇති බවත්, මැතිවරණය පැවැත්වීම සඳහා මෙතෙක් බලාත්මක නීතිමය රාමුවක් සකස් වී නොමැති බවත් පෙන්වා දුන්නාය. විශේෂයෙන්ම මැතිවරණ සීමා නිර්ණ කොට්ඨාස සම්බන්ධ ක්රියාවලිය මෙතෙක් අවසන් වී නොමැති වීම හේතුවෙන් මැතිවරණ කොමිසමට ද ඒ පිළිබඳ නිවේදන නිකුත් කිරීමට බාධා මතු වී ඇත.
මෙම ගැටලු නිරාකරණය කරගැනීම සඳහා අමාත්ය විජිත හේරත් මහතාගේ සභාපතිත්වයෙන් යුත් විශේෂ කමිටුවක් පත් කර ඇති අතර, එම කමිටුව විසින් පාර්ලිමේන්තුවට ඉදිරිපත් කිරීමට නියමිත වාර්තාව පදනම් කරගනිමින් ඉදිරි කටයුතු සිදු කෙරෙනු ඇත. රනිල් වික්රමසිංහ මහතාගේ ප්රජාතන්ත්රවාදී භාවය පිළිබඳව රවී කරුණානායක මහතාටම නිගමනයකට පැමිණිය හැකි බව පැවසූ අගමැතිනිය, අතීතයේදී ඡන්ද කල් දැමීමට කටයුතු කළ පක්ෂයක සාමාජිකයෙකු මෙවැනි ප්රශ්න නැඟීම සුදුසු නොවන බව ද වැඩිදුරටත් කියා සිටියාය.
