කොවිඩ් රෝගීන් වෙනුවෙන් ගම්පහ රෝහලේ ස්ථාපිත කර ඇති Respiratory High Dependency Unit (HDU) ඒකකය ප්‍රාථමික සෞඛ්‍ය සේවා, වසංගත රෝග සහ කොවිඩ් රෝග පාලන කටයුතු රාජ්‍ය අමාත්‍ය විශේෂඥ වෛද්‍ය සුදර්ශිනී ප්‍රනාන්දුපුල්ලේ මහත්මියගේ සහභාගීත්වයෙන් අද (26) දින විවෘත විය.
ගම්පහ රෝහලේ අධ්‍යක්ෂතුමා ඇතුලු සියලුම සෞඛ්‍ය කාර්ය මණ්ඩලයේ කැපවීම මත කඩිනමින් මෙහි කටයුතු ආරම්භ කිරීමට හැකිවීම පිළිබදව සිය ස්තුතිය පළකල රාජ්‍ය අමාත්‍යවරිය වැඩිදුරටත් සදහන් කර සිටියේ මේ දිනවල රජය විසින් පනවා ඇති දැඩි සංචරණ සීමාවල සාධනීය ප්‍රතිඵල ජුනි මස 14 වනදා වනවිට දැකීමට අපේක්ෂා කරන බවත් එහි නියම ප්‍රයෝජනය ලබාගැනීමට නම් සෞඛ්‍ය අංශවල උපදෙස් නියමාකාරයෙන් පිළිපදිමින් ජනතාවගේ පූර්ණ සහයෝගය ඒ සදහා ලැබිය යුතු බවයි.
රාජ්‍ය හා පෞද්ගලික ධන පරිත්‍යාගයෙන් ස්ථාපිත කෙරුණු මෙම ඒකකය ඇදන් 15ක ධාරිතාවයකින් යුක්ත අතර ප්‍රසිද්ධ ව්‍යාපාරික ධම්මික පෙරේරා මහතා ඒ සදහා අවශ්‍ය ඔක්සිජන් අවශ්‍යතාව සහ ඇදන් 05ක් ඇතුළු උපකරණ පරිත්‍යාග කර ඇති අතර නාවික හමුදාවේ ශ්‍රමදායකත්වයෙන් මෙහි ඉදිකිරීම් කටයුතු සිදුකර ඇත. රාජ්‍ය අමාත්‍යවරියගේ මැදිහත්වීමෙන් මෙහි ශීතදාමය ආරක්ෂා කිරීමට අවශ්‍ය 24000BTU AC යන්ත්‍ර 05ක් සිංගර් ආයතනය විසින් ලබාදී ඇති අතර සෙසු වෛද්‍ය උපකරණ සහ අවශ්‍යතා සෞඛ්‍ය අමාත්‍යංශය සම්බන්ධීකරණයෙන් ලබාදීමට හැකිවී ඇත.
අසාද්‍ය කොවිඩ් රෝගීන් වෙනුවෙන් ගම්පහ රෝහලේ ආරම්භ කෙරුණු මෙම HDU ඒකකය කඩිනමින් ආරම්භ කිරීමට අවශ්‍ය කටයුතු පිළිබදව රාජ්‍ය අමාත්‍යවරිය පුද්ගලිකව සොයා බැලුවාය.
මෙම අවස්ථාවට ගම්පහ රෝහලේ අධ්‍යක්ෂ වෛද්‍ය ප්‍රියන්ත ඉලේපෙරුම, නියෝජ්‍ය අධ්‍යක්ෂ වෛද්‍ය ප්‍රියන්ත ශිරෝමන්, HDU ඒකකය භාර විශේෂඥ වෛද්‍ය බෝධික සමරසිංහ, විශේෂඥ වෛද්‍ය මහාචාර්ය අනුර මුණසිංහ, විශේෂඥ වෛද්‍ය සමන් කුලරත්න, විශේෂඥ වෛද්‍ය ශ්‍රීධරන් යන වෛද්‍ය විශේෂඥයින් සමග රමාල් සිරිවර්ධන, තිලක් හතුරුසිංහ යන මහත්වරු එක්විය.
