එච්.එන්.බී. ෆිනෑන්ස් සමාගමේ ස්වාධීන නොවන විධායක නොවන අධ්යක්ෂවරුන් ලෙස සිවරාජා නන්දකුමාර් සහ පොන්නෙහෙන්නැදිගේ තුමුදු සුපුන් ඩයස් යන මහත්වරුන් පත් කර ඇත. නන්දකුමාර් මහතා ශ්රී ජයවර්ධනපුර විශ්වවිද්යාලයේ පශ්චාත් උපාධි කළමනාකරණ ආයතනයෙන් ව්යාපාර පරිපාලනය පිළිබඳ ශාස්ත්රපති උපාධියක් හිමිකරගෙන ඇති අතර, ශ්රී ලංකා බැංකුකරුවන්ගේ ආයතනයේ සහකාර සාමාජිකයෙක් ද වේ. ඔහු මේ වන විට හැටන් නැෂනල් බැංකුවේ විධායක උප සභාපති සහ ප්රධාන ව්යාපාර මෙහෙයුම් නිලධාරී ලෙස කටයුතු කරමින් මධ්යගත මෙහෙයුම් සහ සහායක සේවා ඇතුළු සමස්ත මෙහෙයුම් කටයුතු සඳහා නායකත්වය ලබා දෙයි. මීට අමතරව, ලංකා ෆිනෑන්ෂල් සර්විසස් බියුරෝ හි ස්වාධීන නොවන විධායක නොවන අධ්යක්ෂවරයෙකු ලෙසත්, එහි විගණන කමිටු සාමාජිකයෙකු ලෙසත් ඔහු කටයුතු කරයි. හැටන් නැෂනල් බැංකුවේ වසර 34කට අධික සේවා පළපුරුද්දක් ඇති ඔහු, ශාඛා බැංකුකරණය, මෙහෙයුම් කළමනාකරණය සහ ව්යාපාර සංවර්ධනය ඇතුළු ක්ෂේත්ර රැසක සුවිශේෂී දායකත්වයක් ලබා දී ඇත.
සුපුන් ඩයස් මහතා එක්සත් රාජධානියේ චාටර්ඩ් ඉන්ස්ටිටියුට් ඔෆ් මාකටින් ආයතනයෙන් අලෙවිකරණය පිළිබඳ පශ්චාත් උපාධි ඩිප්ලෝමාවක් ලබා ඇති අතර, එම ආයතනයේ වරලත් අලෙවිකරුවෙකු මෙන්ම ශ්රී ලංකා අලෙවිකරණ ආයතනයේ සාමාන්ය යාවජීව සාමාජිකයෙක් ද වේ. ඔහු මේ වන විට හැටන් නැෂනල් බැංකුවේ විධායක උප සභාපති සහ ජාල ව්යාපාර ප්රධානී ලෙස කටයුතු කරමින් බැංකුවේ ශාඛා ජාලය සහ බෙදාහැරීමේ නාලිකා සඳහා උපායමාර්ගික නායකත්වය ලබා දෙයි. හැටන් නැෂනල් බැංකුවේ වසර 34කට වැඩි සේවා කාලයක් ඇති ඩයස් මහතා, අලෙවිකරණය සහ ජාල කළමනාකරණය ප්රධාන කරගත් ආයතනික කළමනාකරණ තනතුරු රැසක් හොබවා ඇත.
