හැටන් නැෂනල් බැංකුව (HNB) සහ Toyota Lanka (Pvt) Ltd අතර දිගුකාලීන හවුල්කාරීත්වය යළි අලුත් කර තිබේ. ඒ හරහා මෙරට පාරිභෝගිකයන්ට Toyota වාහන සහ කාර්මික යන්ත්‍රෝපකරණ වඩාත් පහසුවෙන් හා සහනදායී මූල්‍ය පහසුකම් යටතේ මිලදී ගැනීමට අවස්ථාව සැලසේ.
මෙම හවුල්කාරීත්වය යටතේ Toyota Lite Ace වෑන් සහ ට්‍රක් රථ, Toyota Forklifts සහ Toyota Hino වාණිජ රථ ඇතුළු Toyota සන්නාමයට අයත් වාහන හා යන්ත්‍රෝපකරණ සඳහා විශේෂ මූල්‍ය පහසුකම් ලබාගත හැකිය.
HNB පාරිභෝගික ඒකක හරහා පාරිභෝගිකයන්ට නම්‍යශීලී ලීසිං විසඳුම් රැසක් හඳුන්වා දී ඇති අතර, මගී ප්‍රවාහන රථ මිලදී ගන්නා පාරිභෝගිකයන් වෙනුවෙන් විශේෂ පොලී අනුපාත ද පිරිනැමේ.
එසේම, පාරිභෝගික අවශ්‍යතා අනුව සකස් කළ ලීසිං ක්‍රමවේද යටතේ ලියාපදිංචි නොකළ වාහන සඳහා විශේෂ සහන සහ නම්‍යශීලී ඉතිරි වටිනාකම් (Residual Value) විකල්ප ද ලබාදීමට කටයුතු කර තිබේ. සුදුසුකම් සපුරන පාරිභෝගිකයන්ට 50% දක්වා ඉහළ ඉතිරි වටිනාකමක් සහිත ලීසිං පහසුකම් ලබාගත හැකි බව සඳහන් වේ.
HNB කළමනාකාර අධ්‍යක්ෂ සහ ප්‍රධාන විධායක නිලධාරී දමිත් පල්ලෙවත්ත මහතා සඳහන් කර ඇත්තේ පාරිභෝගිකයන්ට උපරිම මූල්‍ය නිදහසක් ලබාදෙමින් වාහන හිමිකාරිත්වය වඩාත් පහසු අත්දැකීමක් බවට පත් කිරීම මෙම හවුල්කාරීත්වයේ අරමුණ බවයි.
මෙම වැඩපිළිවෙළ යටතේ පළමු වසරේ වාර්ෂික ගාස්තුවෙන් නිදහස් කළ නොමිලේ HNB ක්‍රෙඩිට් කාඩ්පතක් ලබාදීම සහ HNB General Insurance හරහා විශේෂ වට්ටම් සහිත වාහන රක්ෂණ වාරික පහසුකම් ලබාදීම ද ඇතුළත් වේ.
Toyota Lanka සමාගමේ කළමනාකාර අධ්‍යක්ෂ සහ ප්‍රධාන විධායක නිලධාරී මනෝහර අතුකෝරල මහතා සඳහන් කර ඇත්තේ ‘Mobility for All’ දැක්මට අනුව මෙරට ජනතාවට වාහන හිමිකාරිත්වය වඩාත් පහසු කරදීම සඳහා HNB සමඟ එක්ව කටයුතු කිරීමට ලැබීම සතුටට කරුණක් බවයි.
මෙම හවුල්කාරීත්වය හරහා පුද්ගලයන්ට, පවුල්වලට සහ ව්‍යාපාරිකයන්ට තම අවශ්‍යතා අනුව වාහන හා යන්ත්‍රෝපකරණ මිලදී ගැනීමට වඩාත් නම්‍යශීලී මූල්‍ය විසඳුම් ලබාදීම අපේක්ෂා කෙරේ.
