ජාත්‍යන්තර ගුරු දිනයට සමගාමීව සාම්ප්‍රදායික උත්සව රටාවෙන් ඔබ්බට යමින් ගුරු-සිසු සබඳතාවයේ අතිශය උතුම් හා ආධ්‍යාත්මික පදනම තහවුරු කෙරෙන වෙනස්ම අයුරේ උපහාර වැඩසටහනක් සංවිධානය කිරීමට හොරණ දොන් පේද්‍රික් මහා විද්‍යාලය කටයුතු කර තිබේ. විදුහල්පති සුසන්ත ජයනාල් පෙරේරා මහතාගේ සංකල්පයකට අනුව ක්‍රියාත්මක වූ මෙම වැඩසටහනේදී, පාසලේ 7 ශ්‍රේණියේ සිට උසස් පෙළ දක්වා ඉගෙනුම ලබන සිසුන් 24 දෙනෙකුගෙන් සමන්විත ගිහි ශිෂ්‍ය පිරිත් කණ්ඩායමක් විසින් සියලුම ගුරු භවතුන් උදෙසා සෙත් පිරිත් සජ්ඣායනා කරමින් ආශීර්වාද පිරිනැමීම කැපී පෙනෙන සිදුවීමක් විය.
දෙමාපියන් සහ ප්‍රවීණ පිරිත් දේශකයන් වන බන්දුල පී. බැද්දගේ සහ සංජීව කවීෂ්වර යන මහත්වරුන්ගේ උපදෙස් මත සති කිහිපයක් පුරා පිරිත් සූත්‍ර උච්චාරණය හා අදාළ වත්පිළිවෙත් පිළිබඳ විශේෂ පුහුණුවක් ලැබූ මෙම සිසු පිරිස, සතියක් පුරා මස් මාංසවලින් වැළකී පේවීමෙන් අනතුරුව මෙම පුණ්‍යකර්මයට එක්ව සිටියහ. පාසල් පරිශ්‍රයේ විශේෂයෙන් නිර්මාණය කරන ලද පිරිත් මණ්ඩපයකදී මහා මංගල, රතන, කරණීය මෙත්ත සහ මෝර පිරිත් සජ්ඣායනා කිරීමෙන් අනතුරුව, පෙහෙවස් සමාදන් වූ සිසුන් විසින්ම ගුරුවරුන්ට පිරිත් පැන් ලබා දී පිරිත් නූල් බැඳීම සිදු කළ අතර, පසුව එම දරුවන් වෙනුවෙන් හීල් දානය සහ පිරිකර පූජා කිරීමටද විද්‍යාලීය බෞද්ධ සංගමය ඇතුළු ගුරු මණ්ඩලය කටයුතු යොදා තිබිණි.
ගුරු, සිසු සහ දෙමාපිය යන පාර්ශවයන්හි පූර්ණ දායකත්වයෙන් සාර්ථක වූ මෙම අදර්ශමත් මංගල්‍යය ඉදිරියේදීත් සෑම ගුරු උපහාර උළෙලකදීම පැවැත්වීමට විද්‍යාලීය පාලනාධිකාරිය තීරණය කර ඇති අතර, කලාපයේ අනෙකුත් පාසල්වල ආගමික වැඩසටහන් සඳහාද මෙම පුහුණු ලත් ගිහි ශිෂ්‍ය පිරිත් කණ්ඩායමේ දායකත්වය ලබාදීමට සැලසුම් කර ඇත. නූතන අධ්‍යාපන පද්ධතිය තුළ සංස්කෘතික හා ආගමික වටිනාකම් පෙරදැරි කරගත් මෙවැනි ගුණාත්මක සංකල්ප, සිසුන් තුළ ආකල්පමය වෙනසක් ඇති කිරීමට මෙන්ම ගුරු-සිසු සබඳතාවයේ ශක්තිමත්භාවය තහවුරු කිරීමටද මහෝපකාරී වනු ඇත.
