හෝර්මුස් සමුද්ර සන්ධිය වසා දැමීමෙන් ගෝලීය බලශක්ති වෙළඳපොළ තුළ වැඩිම වාසි අත්කරගෙන ඇත්තේ ඇමරිකානු බලශක්ති සමාගම් බව රුසියාවේ රොස්නෙෆ්ට් සමාගමේ ප්රධාන විධායක නිලධාරී ඉගෝර් සෙචින් මහතා පවසයි. ශාන්ත පීටර්ස්බර්ග් ජාත්යන්තර ආර්ථික සංසදයේදී අදහස් දක්වමින් ඔහු සඳහන් කළේ, වොෂින්ටනය ගෝලීය බලශක්ති වෙළඳපොළේ මූලික සැකසුම් ඇමරිකානු අවශ්යතා මත වෙනස් කිරීමට උත්සාහ කරන බවයි.
පසුගිය පෙබරවාරි මාසයේදී ඇමරිකාව සහ ඊශ්රායලය විසින් ඉරානයට ප්රහාර එල්ල කරමින් ඉරානයේ උත්තරීතර නායක අයතුල්ලා අලි කමේනි මහතාව ඝාතනය කිරීමෙන් පසු, ඉරානය විසින් ලෝක තෙල් සැපයුමෙන් පහෙන් එකක් පමණ ගමන් ගන්නා ප්රධාන මාර්ගය වන හෝර්මුස් සමුද්ර සන්ධිය වසා දැමීම සිදු විය. ඊට ප්රතිචාර වශයෙන් ඇමරිකාව විසින් ඉරාන වරායන් ද අවහිර කරනු ලැබීය.
සෙචින් මහතා වැඩිදුරටත් අවධාරණය කළේ හෝර්මුස් සමුද්ර සන්ධිය වැසීම ගෝලීය වෙළඳපොළ දැඩි අස්ථාවරත්වයකට ලක් කර ඇති බවයි. එහි ප්රතිඵලයක් ලෙස තෙල් මිල බහු-වසරක ඉහළම අගයකට පැමිණීම සහ ගෝලීය උද්ධමනය ඉහළ යාම හේතුවෙන් ලෝක ආර්ථික වර්ධනය බරපතල ලෙස අඩාල වී තිබේ. මෙම ක්රියාවන් ඉරානය ඉලක්ක කරගෙන සිදු කළ ද, එහි අහිතකර බලපෑම මුළු ලෝකයටම දැනී ඇති බවත්, උපායමාර්ගික අවදානම් පිළිබඳ නිසි තක්සේරුවක් නොතිබූ බවත් ඔහු පෙන්වා දෙයි.
තවද, එක්සත් අරාබි එමීර් රාජ්යය OPEC+ සන්ධානයෙන් ඉවත් වීම හේතුවෙන් එම බලශක්ති නිෂ්පාදකයින්ගේ කණ්ඩායමේ ඇති හැකියාවන් සහ බලපෑම් කිරීමේ ශක්තිය අඩුවී ඇති බවද රුසියානු ජනාධිපති ව්ලැඩිමීර් පුටින්ගේ සමීපතමයෙකු වන සෙචින් මහතා වැඩිදුරටත් සඳහන් කළේය.
