නිවාස සංවර්ධන අධිකාරිය මඟින් ඉදිකරන ලද අඟුලාන සයුරුපුර, බොරැල්ල සහස්පුර සහ සිංහපුර (අදියර I හා අදියර II) නිවාස සංකීර්ණවල අත්යවශ්ය අලුත්වැඩියා කටයුතු කඩිනමින් සිදු කිරීම සඳහා අමාත්ය මණ්ඩලයේ නිල අනුමැතිය හිමි වී තිබේ. නාගරික අඩු පහසුකම් සහිත ජනාවාසවල ජීවත් වන ජනතාවගේ ජීවන තත්ත්වය නංවාලීම, ඔවුන්ගේ ආරක්ෂාව පූර්ණ ලෙස තහවුරු කිරීම සහ නිවාස ගොඩනැගිලිවල කල්පැවැත්ම දීර්ඝ කිරීමේ මූලික අරමුණින් මෙම ව්යාපෘතිය ක්රියාත්මක කිරීමට නියමිතය. මෙම අලුත්වැඩියා කටයුතු වෙනුවෙන් රුපියල් මිලියන 764.09ක මුදලක් වැය වනු ඇතැයි ඇස්තමේන්තු කර ඇති අතර, සම්පූර්ණයෙන්ම මහා භාණ්ඩාගාර අරමුදල් යොදා ගනිමින් 2026 සහ 2027 යන දෙවසර තුළ අදාළ වැඩ කටයුතු සම්පූර්ණ කිරීමට සැලසුම් කර ඇත.ප්රවාහන, මහාමාර්ග සහ නාගරික සංවර්ධන අමාත්ය බිමල් රත්නායක මහතා විසින් ඉදිරිපත් කරන ලද මෙම යෝජනාව අමාත්ය මණ්ඩලය විසින් අනුමත කරනු ලැබ ඇති අතර, එමඟින් නාගරික අඩු ආදායම්ලාභී ජනතාවට වඩාත් ආරක්ෂිත සහ සුවපහසු ජීවන පරිසරයක් නිර්මාණය වනු ඇතැයි අපේක්ෂා කෙරේ.
