ඇමරිකා එක්සත් ජනපදය විසින් ආනයනික වාහන මත පනවන ලද බදු (Tariffs) හේතුවෙන් හුන්ඩායි මෝටර් රථ සමාගමේ පළමු කාර්තුවේ මෙහෙයුම් ලාභය සියයට 30.8 කින් පහත වැටී ඇති බව එම සමාගම නිවේදනය කරයි. බ්රහස්පතින්දා (අප්රේල් 23) නිකුත් කරන ලද මූල්ය වාර්තාවලට අනුව, සමාගමේ විකුණුම් ආදායම සියයට 3.4 කින් වර්ධනය වුවද, ශුද්ධ ලාභය සැලකිය යුතු ලෙස අඩු වී තිබේ.
පසුගිය වසරේ අප්රේල් මාසයේ සිට කොරියානු මෝටර් රථ ආනයනය මත පනවන ලද සියයට 25 ක බදු ප්රතිශතය මෙම ලාභය අඩුවීමට ප්රධානතම හේතුව වී ඇත. නොවැම්බර් මාසයේ සිට එම බදු ප්රතිශතය සියයට 15 දක්වා අඩු කළ ද, එහි බලපෑම තවමත් පවතින බව සමාගම පෙන්වා දෙයි. මේ හේතුවෙන් පළමු කාර්තුව තුළ වාහන අලෙවිය 976,219 ක් දක්වා සියයට 2.5 කින් පහත වැටී ඇත.
මෙම අර්බුදයට පිළියමක් ලෙස හුන්ඩායි සමාගම ඇමරිකාව තුළ සිය නිෂ්පාදන කටයුතු (Localized production) පුළුල් කිරීමට පියවර ගනිමින් සිටී. පසුගිය වසරේ ආරම්භ කළ ‘Hyundai Motor Group Metaplant America’ කර්මාන්ත ශාලාව හරහා 2030 වසර වන විට වාහන මිලියන 1.2 ක නිෂ්පාදන ධාරිතාවක් ලබා ගැනීමටත්, ඇමරිකාවේ අලෙවි කරන වාහනවලින් සියයට 80 කට වඩා වැඩි ප්රමාණයක් එරට තුළම නිෂ්පාදනය කිරීමටත් සමාගම සැලසුම් කර ඇත.
