ඉන්දීය රජයේ ආධාර වැඩසටහන යටතේ අමෙරිකානු ඩොලර් මිලියන 5කට අධික වටිනාකමකින් යුත් හමුදා සහ වෛද්ය උපකරණ තොගයක් ශ්රී ලංකා යුද්ධ හමුදාව වෙත නිල වශයෙන් භාරදීම ඊයේ (16) ශ්රී ජයවර්ධනපුර කෝට්ටේ පිහිටි ආරක්ෂක මූලස්ථාන සංකීර්ණයේදී සිදු කෙරිණි. හදිසි අනතුරු හා කම්පන සත්කාරක පද්ධතියක් ද ඇතුළත් මෙම උපකරණ තොගය මෙරට ඉන්දීය මහ කොමසාරිස් සන්තෝෂ් ජා මහතා විසින් ආරක්ෂක ලේකම් එයාර් වයිස් මාර්ෂල් සම්පත් තුයියකොන්තා (විශ්රාමික) මහතා වෙත නිල වශයෙන් භාර දෙනු ලැබූ අතර, එම අවස්ථාව සඳහා යුද්ධ හමුදාපති ලුතිනන් ජෙනරල් ලසන්ත රොද්රිගු මහතා ද සහභාගී විය. මීට අමතරව, හයිටි රාජ්යයේ එක්සත් ජාතීන්ගේ සාමසාධක මෙහෙයුම්වල නිරත ශ්රී ලංකා යුද්ධ හමුදා සාමාජිකයින් සඳහා ඉන්දීය යුද්ධ හමුදාවෙන් ලබාදුන් උපකරණ තොගය ද පසුගිය දිනවල කොළඹ වරායට පැමිණි ඉන්දීය නාවික හමුදාවේ ‘INS Sharda’ නෞකාව මගින් දිවයිනට රැගෙන ඒම විශේෂත්වයකි.
මෙම පරිත්යාගය දෙරටේ සන්නද්ධ හමුදාවන් අතර පවතින ශක්තිමත් සහ නොබිඳුණු වෘත්තීයමය සබඳතාවයේ කදිම නිදර්ශනයක් බව ඉන්දීය මහ කොමසාරිස්වරයා මෙහිදී පෙන්වා දුන්නේය. දෙරට අතර පවතින ද්විපාර්ශ්වික ආරක්ෂක සහයෝගීතාව හුදු පුහුණු හුවමාරු හෝ මානුෂීය ආධාරවලින් ඔබ්බට ගොස්, ආරක්ෂක හැකියාවන් ඉහළ නැංවීම, යටිතල පහසුකම් සංවර්ධනය සහ උපායමාර්ගික සම්පත් සැපයීම දක්වා ව්යාප්ත වී තිබීම කලාපීය ආරක්ෂාව සම්බන්ධයෙන් වැදගත් කරුණකි. ආරක්ෂක ලේකම්වරයා ද සඳහන් කළ පරිදි, වසර ගණනාවක් පුරා වර්ධනය වූ මෙම ස්ථාවර ආරක්ෂක බැඳීම දෙරටේ සන්නද්ධ හමුදාවන්ගේ සමීප සම්බන්ධතාවය තවදුරටත් තහවුරු කරයි.
ඉදිරියේදී මෙවැනි ආරක්ෂක සහයෝගීතා වැඩසටහන් මගින් ශ්රී ලංකාවේ ආරක්ෂක හැකියාවන් තවදුරටත් නවීකරණය කිරීමට මග පෑදෙනු ඇතැයි අපේක්ෂා කෙරේ. දෙරටේ සන්නද්ධ හමුදාවන් අතර පවතින මෙම වෘත්තීයමය අන්තර්ක්රියාකාරීත්වය, කලාපීය සාමය සහ ස්ථාවරත්වය පවත්වා ගැනීම සඳහා අනාගතයේදී තීරණාත්මක බලපෑමක් සිදු කරනු ඇත. ඉන්දීය රජයේ මෙම අඛණ්ඩ සහයෝගය, ශ්රී ලංකාවේ ආරක්ෂක අංශවල මෙහෙයුම් කාර්යක්ෂමතාව ඉහළ නැංවීමට මෙන්ම දෙරට අතර පවතින උපායමාර්ගික සබඳතා තවදුරටත් ශක්තිමත් කිරීමට ද ඉවහල් වනු නොඅනුමානයි.
