දකුණු කොරියාවේ දෙදින නිල සංචාරයක නිරත ඉන්දීය විදේශ කටයුතු අමාත්ය එස්. ජයශංකර් මහතා සහ දකුණු කොරියානු විදේශ අමාත්ය චෝ හ්යුන් මහතා අතර සෝල් නුවරදී විශේෂ ද්විපාර්ශ්වික සාකච්ඡාවක් පැවැත්විණි. දෙරට අතර සහයෝගීතාව ශක්තිමත් කිරීම සහ වේගයෙන් වෙනස් වන ගෝලීය තත්ත්වයන් පිළිබඳව මෙහිදී විශේෂ අවධානය යොමු විය.
පසුගිය අප්රේල් මාසයේදී දකුණු කොරියානු ජනාධිපති ලී ජේ-මියුන්ග් මහතා ඉන්දියාවේ සිදු කළ නිල සංචාරයේදී එළඹුණු වෙළඳ, ආයෝජන සහ මූල්ය යන ක්ෂේත්රවලට අදාළ එකඟතා ක්රියාවට නැංවීම පිළිබඳව මෙහිදී දීර්ඝ වශයෙන් සාකච්ඡා කෙරිණි. දෙරට අතර පවතින සබඳතා වඩාත් ඉදිරිගාමී හා සමකාලීන හවුල්කාරිත්වයක් දක්වා වර්ධනය කිරීමේ වගකීම තමන් සතු බව අමාත්ය ජයශංකර් අවධාරණය කළේය. සබඳතාවල පවතින සැබෑ විභවතාවයන් තවමත් සම්පූර්ණයෙන් සාක්ෂාත් කරගෙන නොමැති බවත්, ඒ සඳහා උපරිම කැපවීමෙන් කටයුතු කරන බවත් ඔහු වැඩිදුරටත් පැවසීය.
දේශපාලන, නැව් නිර්මාණ, වෙළඳ, ආයෝජන, ආරක්ෂක, තාක්ෂණ, පිරිසිදු බලශක්ති සහ සංස්කෘතික යන ක්ෂේත්ර රැසක සහයෝගීතාව සමාලෝචනය කෙරුණු අතර, නව ව්යවසාය, මූල්ය තාක්ෂණය සහ කලාපීය හා ගෝලීය වර්ධනයන් පිළිබඳව ද අදහස් හුවමාරු කර ගන්නා ලදී. පැය තුනකට ආසන්න කාලයක් පුරා පැවැති මෙම සාකච්ඡාව ඉතා ඵලදායී වූ අතර, ජනාධිපති ලී ජේ-මියුන්ග් මහතාගේ ඉන්දීය සංචාරය දෙරටේ සබඳතා නව මානයකට ඔසවා තැබූ සන්ධිස්ථානයක් බව කොරියානු විදේශ අමාත්යවරයා අවධාරණය කළේය.
