මෙරට වෙළෙඳපොළ තුළ අත්යවශ්ය ආහාර ද්‍රව්‍යවල ස්ථාවරත්වය සහ සුරක්ෂිතතාව තහවුරු කිරීමේ අරමුණින්, ඉන්දියාවේ ජාතික සමූපකාර අපනයන සමාගම (NCEL) සහ ශ්‍රී ලංකා පාරිභෝගික සමූපකාර සමිති සංගමය (COOPFED) අතර අත්යවශ්ය ආහාර ද්‍රව්‍ය සැපයීම සඳහා වූ විශේෂ අවබෝධතා ගිවිසුමකට ඊයේ (05) නිල වශයෙන් අත්සන් තබා තිබේ. මෙරට ඉන්දීය මහකොමසාරිස් සන්තෝෂ් ජා සහ වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්‍ය වසන්ත සමරසිංහ යන මහත්වරුන්ගේ ප්‍රධානත්වයෙන් පැවති මෙම උත්සවයේදී, ඉන්දීය සමාගමේ කළමනාකාර අධ්‍යක්ෂ අනුපම් කෞෂි සහ COOPFED සභාපති ආචාර්ය ශාන්ත ජයරත්න යන මහත්වරුන් විසින් අදාළ ගිවිසුම් හුවමාරු කර ගන්නා ලදී.
ආර්ථික අස්ථාවරත්වයන් සහ සැපයුම් දාමයේ ඇතිවිය හැකි අවදානම් මැද ජනතාවට සහනදායී මට්ටමින් අත්යවශ්ය භාණ්ඩ ලබා දීම ජාතික මට්ටමින් දැවෙන ගැටලු වී ඇති වත්මන් පසුබිමක, මෙම ආර්ථික සන්ධානය හරහා මෙරට පාරිභෝගික ජනතාවට ඉමහත් සහනයක් සැලසෙනු ඇතැයි අපේක්ෂා කෙරේ. ගිවිසුම් අත්සන් තැබීමට සමගාමීව, දෙරට අතර පවතින නිදහස් වෙළෙඳ ගිවිසුම (FTA) යාවත්කාලීන කිරීම සහ අන්‍යෝන්‍ය වශයෙන් වාසිදායක වෙළෙඳ හා වාණිජමය ගැටලු විසඳා ගැනීම සම්බන්ධයෙන් ඉන්දීය මහකොමසාරිස්වරයා සහ වෙළෙඳ අමාත්‍යවරයා අතර ඉතා ඵලදායී හා ගැඹුරු සාකච්ඡාවක්ද පවත්වා තිබේ.
මෙම අභිනව සබඳතාව හරහා ඉන්දු-ශ්‍රී ලංකා ආර්ථික සහයෝගීතාව නව මානයකට ප්‍රවිෂ්ඨ වන අතර, එය ඉදිරියේදී කලාපීය ආහාර සුරක්ෂිතතාව සහ ද්විපාර්ශ්වික අපනයන වෙළෙඳපොළ ස්ථාවර කිරීම සඳහා මූලික පදනමක් වනු ඇත. කෙසේ වෙතත්, මෙම සැපයුම් ජාලය අඛණ්ඩව හා විනිවිදභාවයකින් යුතුව පවත්වාගෙන යාම මෙන්ම දේශීය සමූපකාර ක්ෂේත්‍රයේ නිෂ්පාදන ධාරිතාව නංවාලීම සඳහා රජය විසින් අනුගමනය කරනු ලබන ඉදිරි ප්‍රතිපත්තිමය ක්‍රියාමාර්ග මත මෙම ගිවිසුමේ දිගුකාලීන සාර්ථකත්වය රඳා පවතිනු ඇත.
