ඉන්දියාව සහ ශ්රී ලංකාව අතර පවතින ද්විත්ව බදු අය කිරීම වැළැක්වීමේ ගිවිසුම අවභාවිත කරමින් සිදුකරන බදු වංචා සහ බදු පැහැර හැරීම් වැළැක්වීම සඳහා අදාළ බදු ගිවිසුම සංශෝධනය කිරීමට ඉන්දීය මුදල් අමාත්යාංශය පියවර ගෙන තිබේ.
දෙරට අතර ඇති කරගත් මෙම සංශෝධිත නව ප්රොටෝකෝලය පසුගිය ජූනි 19 වනදා සිට බලපැවැත්වෙන පරිදි ක්රියාත්මක කර ඇති අතර, ඉන්දීය මුදල් අමාත්යාංශය මඟින් ඒ පිළිබඳ නිල නිවේදනය නිකුත් කර ඇත. මෙම නව සංශෝධනවලට අදාළ විධිවිධාන 2027 අප්රේල් 01 වනදා සිට ලබන ආදායම් සඳහා ඉන්දියාව තුළ බලපැවැත්වෙනු ඇත.
මෙම සංශෝධනය හරහා අන්තර්ජාතික වශයෙන් පිළිගත් ‘ප්රධාන අරමුණු පරීක්ෂාව’ නමැති බදු විරෝධී නීතිමය රාමුව දෙරට අතර ගිවිසුමට ඇතුළත් කර තිබේ. එමඟින් කිසියම් ආයෝජනයක හෝ ව්යාපාරික ගනුදෙනුවක ප්රධාන අරමුණ සැබෑ වාණිජ කටයුත්තකට වඩා බදු සහන ලබා ගැනීම පමණක් බව පෙන්නුම් කරන්නේ නම්, අදාළ බදු සහන අහෝසි කිරීමට ඉන්දීය බදු බලධාරීන්ට පූර්ණ බලතල හිමිවෙයි. නියමිත බදු ගෙවීම්වලින් මිදීමට හෝ අඩු බදු ප්රතිශතයන් ලබාගැනීමේ අරමුණින් සිදුකරන කපටි ව්යාපාරික ව්යූහයන් වැළැක්වීම මෙහි ප්රධාන අරමුණ වන අතර, සැබෑ ආර්ථික හා වාණිජමය පදනමක් සහිත ව්යාපාරික ගනුදෙනු සඳහා පමණක් ද්විත්ව බදු සහන හිමිවන බව තහවුරු කිරීම මෙමඟින් සිදු කෙරෙන බව මූල්ය හා නීති ක්ෂේත්රයේ විදෙස් විචාරකයෝ පෙන්වා දෙති.
