ඉන්දියාවේ වන්දනා චාරිකා සඳහා පිටත්ව යන ශ්රී ලාංකික වන්දනාකරුවන් වෙනුවෙන් වන වීසා ගාස්තු ප්රතිපත්තියේ කිසිදු වෙනසක් සිදු කර නොමැති අතර, සුදුසුකම් ලබන කණ්ඩායම් සඳහා නොමිලේ වීසා බලපත්ර ලබාගැනීමේ පහසුකම තවදුරටත් සක්රීයව පවතින බව කොළඹ පිහිටි ඉන්දීය මහ කොමසාරිස් කාර්යාලය නිවේදනය කරයි. බුද්ධශාසන, ආගමික හා සංස්කෘතික කටයුතු අමාත්යාංශයේ නිර්දේශ සහිතව පුද්ගලයින් දස දෙනෙකු හෝ ඊට වැඩි කණ්ඩායම් ලෙස බෞද්ධ පූජනීය ස්ථාන ඇතුළු වන්දනා චාරිකා සඳහා ඉන්දියාවට යන ශ්රී ලාංකිකයින්ට මෙම නොමිලේ වීසා පහසුකම හිමි වන බව එම නිවේදනයේ සඳහන් වේ.
ශ්රී ලාංකිකයින්ට ඉන්දීය ඊ-වීසා පහසුකම ද භාවිත කළ හැකි අතර, සාමාන්ය ක්රමවේදය යටතේ කොළඹ, මහනුවර, යාපනය, හම්බන්තොට සහ මඩකලපුව යන නගරවල පිහිටි ඉන්දීය කොන්සල් අයදුම්පත් මධ්යස්ථාන හරහා අන්තර්ජාලය ඔස්සේ අයදුම්පත් යොමු කළ හැකිය. නව ඉන්දීය රෙගුලාසිවලට අනුව වන්දනාකරුවන් කණ්ඩායම් වශයෙන් හෝ තනි තනිව අදාළ මධ්යස්ථාන වෙත පැමිණ ජෛවමිතික තොරතුරු ලබා දීම අනිවාර්ය කර ඇති අතර, එම ජෛවමිතික තොරතුරු ලබා දීම වයස අවුරුදු දොළහත් හැත්තෑවත් අතර අයදුම්කරුවන්ට පමණක් අදාළ වන බව මහ කොමසාරිස් කාර්යාලය පෙන්වා දෙයි.
වීසා සේවා සැපයුම් ආයතනය වෙනස්වීම හේතුවෙන් මෙම පහසුකම තාවකාලිකව අත්හිටුවා තිබූ නමුත්, නව සේවා සැපයුම්කරු රාජකාරි ආරම්භ කිරීමත් සමඟ එම නොමිලේ වීසා නිකුත් කිරීමේ ක්රමවේදය නැවත ක්රියාත්මක කර තිබේ. මෙම අනුමත ක්රමවේදය යටතේ අයදුම් කරන වන්දනාකරුවන්ගෙන් කිසිදු වීසා ගාස්තුවක් අය නොකෙරෙන අතර, අයදුම්පත් භාරගැනීම සහ සේවා සැපයීම වෙනුවෙන් අදාළ මධ්යස්ථානය වෙත රුපියල් එක්දාස් අටසිය පනස් පහක සේවා ගාස්තුවක් පමණක් ගෙවිය යුතු වන අතර, ජෛවමිතික තොරතුරු ලබාදීමට පැමිණෙන ජ්යෙෂ්ඨ පුරවැසියන් සඳහා විශේෂ ඉක්මන් සේවාවක් ද හඳුන්වා දී ඇත.
