වසර 20කට අධික කාලයක් පුරා ඇදී ගිය දැඩි අරගලයකින් අනතුරුව, ඉන්දුනීසියාවේ ගෘහ සේවකයන්ගේ අයිතිවාසිකම් ආරක්ෂා කිරීම සඳහා වන නව පනතක් එරට පාර්ලිමේන්තුව විසින් සම්මත කර තිබේ. ඉන්දුනීසියාවේ මිලියන 4.2කට අධික ගෘහ සේවක පිරිසක් සිටින අතර ඉන් 90%ක්ම කාන්තාවන් වීම විශේෂත්වයකි.
මෙම නව නීතිය යටතේ ගෘහ සේවකයන්ට සෞඛ්ය රක්ෂණ, නිවාඩු දින සහ විශ්රාම වැටුප් හිමිකම් ලැබෙනු ඇත. එසේම සේවා නියුක්ති ආයතන මඟින් වැටුප් කප්පාදු කිරීම තහනම් වන අතර, වයස අවුරුදු 18ට අඩු දරුවන් ගෘහ සේවයේ යෙදවීම ද නීතියෙන් දඬුවම් ලැබිය හැකි වරදක් බවට පත් වේ. මීට පෙර මෙම සේවක පිරිස නීත්යානුකූලව “සේවකයන්” ලෙස වර්ගීකරණය කර නොතිබූ බැවින් ඔවුන්ට කිසිදු නීතිමය රැකවරණයක් හිමි නොවීය.
2004 වසරේදී මුලින්ම ඉදිරිපත් කරන ලද මෙම පනත විවිධ බාධක මධ්යයේ වසර ගණනාවක් ප්රායෝගිකව ක්රියාත්මක නොවී පැවතිණි. 2021 සිට 2024 දක්වා කාලය තුළ පමණක් ගෘහ සේවකයන්ට එරෙහිව සිදුවූ ශාරීරික හා මානසික හිංසනයන් සම්බන්ධ සිද්ධීන් 3,300කට අධික ප්රමාණයක් වාර්තා වී තිබේ. මෙම ඓතිහාසික ජයග්රහණයත් සමඟ බොහෝ සේවකයන් මහත් සතුටට පත්ව සිටින අතර, හාම්පුතුන් මේ පිළිබඳව දැනුවත් කිරීමේ වැඩපිළිවෙළක් ද ක්රියාත්මක කිරීමට නියමිතය.
