හන්තා වෛරසය (Hantavirus) ව්යාප්ත වීම හේතුවෙන් දැඩි අර්බුදයකට ලක්වූ ‘MV Hondius’ නෞකාවේ සිටින මගීන් ආරක්ෂිතව ඉවත් කර ඔවුන්ගේ මව් රටවල් වෙත ගෙන යාම සඳහා ජාත්යන්තර මට්ටමේ මෙහෙයුමක් ආරම්භ කර තිබේ. ස්පාඤ්ඤයට අයත් ටෙනරීෆ් දූපතේ ග්රෙනඩිලා වරායට අද (10) අලුයම මෙම නෞකාව ළඟා වීමට නියමිත අතර, මගීන් ඉවත් කිරීමේ කටයුතු එදිනම මධ්යහ්නයේ සිට ආරම්භ වනු ඇත. ලෝක සෞඛ්ය සංවිධානයේ ප්රධානී ටෙඩ්රොස් ගෙබ්රෙයෙසුස් මහතා ද මෙම මෙහෙයුම අධීක්ෂණය කිරීම සඳහා ටෙනරීෆ් වෙත පැමිණ සිටින අතර, මෙය තවත් ‘කොවිඩ්’ වසංගතයක් වැනි තත්ත්වයක් නොවන බව පවසමින් ඔහු ප්රදේශවාසීන්ගේ බිය දුරු කිරීමට පියවර ගත්තේය.
මෙම නෞකාව තුළ දැනට පුද්ගලයින් අට දෙනෙකු අසනීප වී ඇති අතර ඉන් තිදෙනෙකු ජීවිතක්ෂයට පත්ව ඇති බව තහවුරු කර ඇත. නෞකාව වරායට පැමිණි පසු මගීන් ජනාවාසවලින් බැහැරව පිහිටි ආරක්ෂිත කලාපයක් හරහා විශේෂ වාහන මගින් සෘජුවම ගුවන් තොටුපළ වෙත ප්රවාහනය කිරීමට නියමිතය. බෙල්ජියම, ප්රංශය, ජර්මනිය, අයර්ලන්තය සහ නෙදර්ලන්තය යන රටවල් සිය පුරවැසියන් රැගෙන යාම සඳහා දැනටමත් විශේෂ ගුවන් යානා එවා ඇති අතර, යුරෝපා සංගමය, අමෙරිකාව සහ බ්රිතාන්යය ද සෙසු මගීන් වෙනුවෙන් විශේෂ ප්රවාහන පහසුකම් සලසා තිබේ.
මගීන් සියලු දෙනා ඉවත් කිරීමෙන් පසු නෞකාව නෙදර්ලන්තය බලා යාත්රා කිරීමට නියමිත අතර එහිදී එය සම්පූර්ණයෙන්ම විෂබීජහරණය කිරීමට නියමිතය. බ්රිතාන්ය සහ අමෙරිකානු මගීන් සිය රටවල් වෙත ගිය පසු දින 42 ක කාලයක් නිරෝධායනයට සහ දැඩි සෞඛ්ය අධීක්ෂණයකට ලක් කිරීමට නියමිතව ඇත. සාමාන්යයෙන් මීයන් වැනි සතුන්ගෙන් බෝවන මෙම වෛරසය කලාතුරකින් පුද්ගලයෙකුගෙන් තවත් පුද්ගලයෙකුට සම්ප්රේෂණය විය හැකි බැවින්, මගීන් ගොඩබෑමේදී සහ ප්රවාහනය කිරීමේදී ඉතා දැඩි සෞඛ්යාරක්ෂිත පියවර අනුගමනය කරන බව ස්පාඤ්ඤ බලධාරීන් අවධාරණය කරයි.
