හෝමුස් සමුද්ර සන්ධියේදී නාවික බිම්බෝම්බයක ගැටීමෙන් දැවැන්ත තෙල් ප්රවාහන නෞකාවක් ගිනිගෙන විනාශ වීමත් සමඟ කලාපීය ආරක්ෂක අර්බුදය යළිත් වරක් උග්ර වී තිබේ. මෙම පසුබිම තුළ, සිය පූර්ව කොන්දේසි සම්පූර්ණයෙන්ම සපුරාලන්නේ නැතිව ඇමෙරිකා එක්සත් ජනපදය සමඟ කිසිදු සාකච්ඡාවකට එළඹෙන්නේ නැතැයි ඉරාන ආරක්ෂක අංශ ප්රධානීහු දැඩි ලෙස අවධාරණය කරති.
ඉරානය ආර්ථික වශයෙන් දැඩි පසුබෑමකට ලක්ව ඇති රටක් බවත්, වොෂින්ටනය සමඟ ඉතා ඉක්මනින් එකඟතාවකට පැමිණීමට ටෙහෙරානය අපේක්ෂා කරන බවටත් ඇමෙරිකානු ජනාධිපති ඩොනල්ඩ් ට්රම්ප් සිදු කළ ප්රකාශයට පිළිතුරු දෙමින් ඉරාන උත්තරීතර ජාතික ආරක්ෂක කවුන්සිලයේ ලේකම් මොහ්සෙන් රෙසායි මෙම අදහස් පළ කර ඇත. ඇමෙරිකානු ජනාධිපතිවරයා පරස්පර ප්රකාශ නිකුත් කළද, ඉන් නොමඟ නොයන ලෙස ඔහු පෙන්වා දෙයි.
තෙල් වෙළෙඳපොළ සහ සමුද්ර සන්ධි ආශ්රිත ආරක්ෂක සමීකරණ මේ වන විට මුළුමනින්ම වෙනස් වී ඇති බව අවධාරණය කරන රෙසායි, ඉරානයේ කොන්දේසි පිළිගන්නා තුරු කිසිදු සාකච්ඡාවක් සිදු නොවන බව තරයේ ප්රකාශ කර තිබේ. කලාපයේ ගැටුම් අවසන් කිරීමේ අරමුණින් මීට පෙර ඇති කරගත් අවබෝධතා ගිවිසුම යටතේ පැවැත්වීමට සැලසුම් කර තිබූ සාකච්ඡා ක්රියාවලිය, දෙපාර්ශ්වය අතර හටගත් නව උණුසුම්කාරී තත්ත්වය හමුවේ මේ වන විට සම්පූර්ණයෙන්ම අක්රිය වී ඇති බව වාර්තා වේ.
