2026 අංක 11 දරණ දේශීය ආදායම් සංශෝධන පනත ප්රකාරව, තම ආදායම් බදු වගකීම් හිතාමතාම ඉටු කිරීමට අපොහොසත් වන පුද්ගලයන්ට සහ ආයතනවලට එරෙහිව අපරාධමය නඩු පැවරීමට දේශීය ආදායම් දෙපාර්තමේන්තුව තීරණය කර ඇත.
ආදායම් බදු කාර්යයන් සඳහා ලියාපදිංචි නොවී සිටීම, අනිවාර්ය ආදායම් බදු වාර්තා නිසි ලෙස ගොනු නොකිරීම, සහ රඳවා ගැනීමේ බදු හා අත්තිකාරම් පුද්ගල ආදායම් බදු වාර්ෂිකව ප්රකාශ නොකිරීම වැනි හේතූන් මත මෙම නඩු පැවරීම් සිදුකිරීමට හැකියාව පවතී.
නඩු පැවරීම අවසාන විකල්පය ලෙස භාවිතා කිරීමට දෙපාර්තමේන්තුව තීරණය කර ඇති අතර, නඩු පැවරීමට පෙර අදාළ පාර්ශ්වයට ඒ පිළිබඳව දැනුම් දී නිවේදනයක් නිකුත් කරනු ලබයි. ඒ අනුව සිය වගකීම් ඉටු කිරීමට දින 30ක සහන කාලයක් ලබා දෙනු ඇත. එම සහන කාලය තුළත් අවශ්යතාවයන් ඉටු නොකළහොත්, එම ක්රියාව නීතිමය වරදක් ලෙස සලකා මහෙස්ත්රාත් අධිකරණයක් ඉදිරියේ නඩු පවරනු ලැබේ.
එසේ අධිකරණය හමුවේ වරදකරු වුවහොත්, රුපියල් ලක්ෂ 4ක් නොඉක්මවන දඩයක්, මාස 06ක් නොඉක්මවන සිරදඬුවමක් හෝ එම දඬුවම් දෙකම පැනවීමට අධිකරණයට බලය ඇත. සිය බදු වගකීම් නිසි කලට ඉටු කරමින් නීතිමය ගැටලුවලින් වැළකී සිටින ලෙස දේශීය ආදායම් දෙපාර්තමේන්තුව සියලුම බදු ගෙවන්නන්ගෙන් ඉල්ලා සිටී.
