ද්විපාර්ශ්වික ආරක්ෂක සහ කාර්මික සහයෝගීතාව තවදුරටත් පුළුල් කිරීමේ අරමුණින් ඊශ්රායල ආරක්ෂක අමාත්යාංශයේ අධ්යක්ෂ ජනරාල් මේජර් ජෙනරාල් (විශ්රාමික) අමීර් බාරම් මහතාගේ ප්රධානත්වයෙන් යුත් ඉහළ පෙළේ ආරක්ෂක දූත පිරිසක් ඉන්දියාවේ නිල සංචාරයක නිරත විය. මෙම සංචාරයේදී බාරම් මහතා ඉන්දීය ආරක්ෂක අමාත්ය රාජ්නාත් සිං, ආරක්ෂක ලේකම් රාජේෂ් කුමාර් සිං සහ ආරක්ෂක මාණ්ඩලික ප්රධානී ජෙනරාල් එන්. එස්. රාජා සුබ්රමණි ඇතුළු ඉහළ පෙළේ නිලධාරීන් හමුවී සාකච්ඡා පැවැත්වූ බව වාර්තා වේ.
මෙම සාකච්ඡා වටය උපායමාර්ගික හවුල්කාරිත්වය ශක්තිමත් කිරීමට, ආරක්ෂක අපනයන පුළුල් කිරීමට සහ ඊශ්රායල ආරක්ෂක කර්මාන්තයට සහයෝගය දැක්වීමට ඊශ්රායලය ක්රියාත්මක කරන පුළුල් වැඩපිළිවෙළෙහි තවත් වැදගත් පියවරක් ලෙස සැලකේ. ඉන්දියාව යනු ඊශ්රායල රාජ්යයේ ප්රධානතම උපායමාර්ගික හවුල්කරුවෙකු බව පෙන්වා දුන් බාරම් මහතා, මෙම සංචාරය දෙරට අතර වර්ධනය වන ආරක්ෂක සහ කාර්මික සන්ධානය පුළුල් කිරීමට දෙරටම දක්වන ඉහළ වැදගත්කම මැනවින් පිළිබිඹු කරන බව සඳහන් කළේය.
දෙරට අතර පවතින මෙම සබඳතාව හුදු දේශපාලන හෝ ආර්ථික අවශ්යතාවලින් ඔබ්බට ගිය, පොදු වටිනාකම්, ගැඹුරු සංස්කෘතික ඇගයීම් සහ අන්යෝන්ය විශ්වාසය මත පදනම් වූවක් බව ඔහු වැඩිදුරටත් අවධාරණය කළේය. එවැනි අභිමතාර්ථයන් මත පදනම් වූ හවුල්කාරිත්වය හේතුවෙන් දෙරට එක්ව ක්රියාත්මක කරන ඒකාබද්ධ ව්යාපෘති වඩාත් අර්ථවත් වන බවද ඒ මහතා වැඩිදුරටත් පෙන්වා දුන්නේය.
