ඊශ්රායල දේශසීමාවේ සිට සැතපුම් 25 ක් (කිලෝමීටර් 40 ක්) පමණ ගැඹුරට විහිදෙන දකුණු ලෙබනන කලාපයේ පදිංචිකරුවන්ට වහාම එම ප්රදේශවලින් ඉවත් වන ලෙස ඊශ්රායල හමුදාව අද (18) තෙවන වරටත් දැඩි ලෙස අවවාද කළේය. හෙස්බොල්ලා ඉලක්ක වෙත එල්ල කරන දැවැන්ත ගුවන් ප්රහාර මාලාවකට පෙර, ප්රදේශවාසීන්ට සහබා පාලමෙන් ඔබ්බට එනම් සහ්රානි (Zahrani) ගංගාවෙන් උතුරු දෙසට ගමන් කරන ලෙස ඊශ්රායල හමුදාවේ අරාබි භාෂා ප්රකාශක අවිචේ අද්රායි (Avichai Adraee) නියෝග කර තිබේ.
මෙම ඉවත් කිරීමේ නියෝගය නබාටියේ (Nabatieh) වැනි ප්රධාන ලෙබනන නගර සහ ගම්මාන දුසිම් ගණනක් ආවරණය වන පරිදි නිකුත් කර ඇත. මීට පෙර ලිටානි ගඟෙන් දකුණු ප්රදේශයට සහ බීරූට් නුවර දකුණු තදාසන්න ප්රදේශවලට ද මෙවැනිම නියෝග නිකුත් කර තිබුණි. ඊශ්රායල ආරක්ෂක අංශ (IDF) ප්රකාශ කරන්නේ තම හමුදා එම ප්රදේශවල ඉතා බලවත් ලෙස ක්රියාත්මක වන බැවින් සිවිල් වැසියන්ගේ ආරක්ෂාව වෙනුවෙන් වහාම නිවෙස්වලින් ඉවත් විය යුතු බවයි.
පවතින දරුණු ගැටුම් හේතුවෙන් මේ වන විට ලෙබනන ජනගහනයෙන් 20% ක් පමණ, එනම් මිලියනයකට ආසන්න පිරිසක් අවතැන් වී ඇති බව වාර්තා වේ. ලෙබනන බලධාරීන් පවසන පරිදි ඊශ්රායල ප්රහාරවලින් මේ වන විට පුද්ගලයින් 900 කට අධික සංඛ්යාවක් ජීවිතක්ෂයට පත්ව ඇත. මැදපෙරදිග කලාපය පුරා ව්යාප්ත වෙමින් පවතින මෙම යුදමය වාතාවරණය හේතුවෙන් මානුෂීය අර්බුදය තවත් උග්ර වෙමින් පවතින අතර ජාත්යන්තර ප්රජාව මේ සම්බන්ධයෙන් දැඩි කනස්සල්ල පළ කර සිටියි.
