ඩොමිනිකන් ජනරජයේ බයාහිබේ වෙරළ තීරයේ පිහිටි සුඛෝපභෝගී නිවාඩු නිකේතනයක හටගත් දැවැන්ත ගින්නකින් ඉතාලි ජාතික 46 හැවිරිදි කාන්තාවක් ජීවිතක්ෂයට පත්ව තිබේ. මෙම අනතුර හේතුවෙන් එම හෝටලයේ රැඳී සිටි සංචාරකයින් 1,700කට ආසන්න පිරිසක් ආරක්ෂිතව ඉවත් කිරීමට බලධාරීන් කටයුතු කර ඇති අතර, ගින්න හටගෙන ඇත්තේ ලොව පුරා හෝටල් 8,400කට අධික සංඛ්යාවක හිමිකාරීත්වය දරන වින්ඩ්හැම් (Wyndham) හෝටල් ජාලයට අයත් නිවාඩු නිකේතනයකය. කෙසේ වෙතත්, ඒ ආසන්නයේම පිහිටි ‘වීවා වින්ඩ්හැම් ඩොමිනිකස් මාලිගයට’ මෙම ගින්නෙන් කිසිදු හානියක් සිදුව නොමැති බව වාර්තා වේ.
නිවාඩු නිකේතනයේ වහලවල් පිදුරු සහ තල්කොළවලින් සෙවිලි කර තිබීම සහ එම අවස්ථාවේ පැවති තද සුළං තත්ත්වය හේතුවෙන් ගින්න ඉතා වේගයෙන් හෝටල් සංකීර්ණය පුරා පැතිර ගිය බව ඩොමිනිකන් ජනරජයේ හදිසි මෙහෙයුම් මධ්යස්ථානය සඳහන් කරයි. ගින්නෙන් අනතුරුව වෙරළ තීරයට ඉහළින් විශාල අඳුරු දුමාරයක් නැගී ගිය අතර, ගිනි නිවන කණ්ඩායම්වල දැඩි උත්සාහයකින් පසුව මේ වන විට ගින්න පාලනය කර ඇත.
සිද්ධියට හේතුව මෙතෙක් අනාවරණය වී නොමැති අතර, එරට ආරක්ෂක අංශ විසින් ඒ සම්බන්ධයෙන් පුළුල් විමර්ශන ආරම්භ කර තිබේ. කැරිබියානු කලාපයේ ඉහළම සංචාරක ආකර්ෂණයක් හිමි ඩොමිනිකන් ජනරජයට මෙම වසරේ මුල් මාස පහ තුළ පමණක් මිලියන 5.6ක සංචාරකයින් පිරිසක් පැමිණ ඇති අතර, මෙම ඛේදජනක සිදුවීම සංචාරක ක්ෂේත්රය තුළ දැඩි කම්පනයක් ඇති කිරීමට හේතු වී ඇත.
