ඇමෙරිකානු ජනාධිපති ඩොනල්ඩ් ට්රම්ප් සහ මෙලානියා ට්රම්ප් යුවළ ඉලක්ක කර ගනිමින් සිදුකළ “අනාගත වැන්දඹුව” (Expectant Widow) යන ප්රකාශය සම්බන්ධයෙන් එල්ල වන දැඩි විවේචන හමුවේ වුවද, ප්රකට හාස්යෝත්පාදක වැඩසටහන් මෙහෙයවන්නෙකු වන ජිමී කිමෙල් සිය ස්ථාවරය වෙනස් කිරීමට අකමැත්ත පළ කර තිබේ. ඊයේ රාත්රියේ සිය වැඩසටහන අතරතුර අදහස් දක්වමින් ඔහු කියා සිටියේ, එම ප්රකාශය හුදෙක් ට්රම්ප් යුවළ අතර පවතින වයස් පරතරය පිළිබඳව සිදුකළ සැහැල්ලු විහිළුවක් පමණක් බවයි. පසුගිය බ්රහස්පතින්දා පැවති වැඩසටහනකදී ඔහු මෙලානියා ට්රම්ප් මහත්මිය මෙලෙස හැඳින්වූයේ ජනාධිපතිවරයාට දැන් වයස අවුරුදු 80ක් පමණ වන බවත්, ඇය ඔහුට වඩා බෙහෙවින් බාල බවත් පෙන්වා දෙමිනි.
කෙසේ වෙතත්, මෙම ප්රකාශය ජනාධිපතිවරයා ඝාතනය කිරීමකට කරන ලද වක්ර අනුබලයක් ලෙස හඳුන්වමින් මෙලානියා ට්රම්ප් මහත්මිය ABC නාලිකාවෙන් ඉල්ලා සිටියේ වහාම ජිමී කිමෙල්ව සේවයෙන් ඉවත් කරන ලෙසයි. මීට පිළිතුරු දෙමින් කිමෙල් අවධාරණය කළේ තමන් සැමවිටම ප්රචණ්ඩත්වයට එරෙහිව හඬ නගන පුද්ගලයෙකු බවත්, මෙම විහිළුව කිසිසේත්ම ඝාතන ප්රයත්නයක් සමඟ සම්බන්ධ කළ නොහැකි බවත්ය. මෙලානියා ට්රම්ප් මහත්මිය පසුගිය සති අන්තයේ පීඩාකාරී අත්දැකීමකට මුහුණ දුන් බව තමන් දන්නා නමුත්, මෙම ප්රකාශය වැරදි ලෙස අර්ථකථනය කර ඇති බව ඔහු වැඩිදුරටත් පැවසීය. මෙම අර්බුදයත් සමඟ ඇමෙරිකානු සමාජ මාධ්ය ජාල තුළ ප්රකාශන නිදහස සහ දේශපාලන පුද්ගලයින් විවේචනය කිරීමේ සීමාවන් පිළිබඳව ද යළි දැඩි කතාබහක් මතුව තිබේ.
