වැවිලි සහ ප්රජා යටිතල පහසුකම් අමාත්යාංශය මලයගම් ප්රජාව සඳහා ක්රියාත්මක කළ කබරගල නවෝදයාපුරම් නිවාස ව්යාපෘතිය ලබන 28 වනදාට පෙර ජනතා අයිතියට පත්කිරීමට සියලු කටයුතු සූදානම් කර ඇත.
පසුගිය 2023 වසරේ මාර්තු 19 වන දින බදුල්ල, හල්දුම්මුල්ල, පුනාගල, කබරගල සහ ලියන්ගහවෙල කන්ද යන ප්රදේශවල සිදුවූ නායයෑම් හේතුවෙන් පවුල් 50කට පමණ නිවාස අහිමි විය. එතැන් පටන් වසර තුනහමාරකට ආසන්න කාලයක් මෙම පිරිස ප්රදේශයේ වසා දමා තිබූ තේ කර්මාන්ත ශාලාවක අතිශය දුෂ්කර තත්ත්වයන් යටතේ ජීවත් වූ අතර, වත්මන් රජය බලයට පත්වීමත් සමඟ මෙම නිවාස ගැටලුවට ස්ථිර විසඳුමක් ලබා දීමට පියවර ගත්තේය.
‘මලෛයග මහිල්ච්චි’ වැඩසටහන යටතේ ආරම්භ කරන ලද මෙම නව නිවාස ව්යාපෘතිය යටතේ, එක් පවුලකට පර්චස් 10 බැගින් වූ ඉඩමක වර්ග අඩි 550කින් සමන්විත අංගසම්පූර්ණ නිවසක් ඉදිකර තිබේ. මෙවැනි එක් නිවාස ඒකකයක් සඳහා රුපියල් ලක්ෂ 32ක පමණ මුදලක් වැය කර ඇති අතර, නායයෑම්වලින් පීඩාවට පත් පවුල් 50ක් වෙනුවෙන් මෙම නිවාස ඉදිකර ඇත.
2025 වසරේ ජනවාරි 10 වන දින මේ පිළිබඳ මූලික සාකච්ඡාවක් පවත්වා, එම වසරේම මාර්තු 15 වන දින නිවාස ඉදිකිරීමේ කටයුතු ආරම්භ විය. අමාත්ය සමන්ත විද්යාරත්න මහතාගේ සෘජු මැදිහත් වීමෙන් යුද හමුදාවේ ඉංජිනේරු සේවා බලකාය සහ අනෙකුත් අදාළ පාර්ශ්වයන් ලබාදුන් දායකත්වය මෙහිදී කැපී පෙනේ. වසර තුනහමාරක අතිශය දුෂ්කර ජීවිතයකින් පසු මෙම ජනතාවට ඉඩමක් සමඟ නව නිවසක් හිමිවීම ඔවුන්ට යළි ජීවිතය ලැබුණු බවට සහ නව බලාපොරොත්තු ඇති කිරීමක් වන අතර, එමඟින් ඔවුන්ගේ පවුල්වල ආරක්ෂාව, ගෞරවය මෙන්ම දරුවන්ට නිදහසේ අධ්යාපනය ලැබීමේ අවස්ථාවද උදා වේ.
