මහනුවර දිස්ත්රික්කයේ, කඩුගන්නාව, හේනාවල ප්රදේශයට අයත් කුරුදුවත්ත ගම සහ ඒ අවට ප්රදේශවාසීන් වසර දෙක තුනක සිට මුහුණ දෙන අතිශය බරපතළ සහ අසාධාරණ විදුලි බිඳවැටීමේ ගැටලුවක් පිළිබඳව ප්රදේශවාසීන් විසින් සමාජ මාධ්ය ඔස්සේ බලධාරීන්ගේ අවධානය පිණිස දැවැන්ත විරෝධයක් සහ ආයාචනයක් ඉදිරිපත් කර තිබේ. ප්රදේශවාසීන් චෝදනා කරන්නේ කිසිදු පූර්ව දැනුම් දීමකින් තොරව දිනකට අවම වශයෙන් 6-7 වතාවකට වඩා වැඩි වාර ගණනක් විදුලිය කප්පාදු වන බවත්, ඇතැම් දිනවල මෙම තත්ත්වය 10-15 වතාවක් දක්වා උපරිම මට්ටමකින් සිදුවන බවත්ය.
සමහර අවස්ථාවලදී මෙම විදුලි බිඳවැටීම් මිනිත්තු කිහිපයකට සීමා වුවද, පැය ගණන් දීර්ඝ වන අවස්ථාවන් ඕනෑතරම් පවතින බව පවසන ජනතාව, මේ වන විට වසර කිහිපයක් තිස්සේ දිනකට අවම වශයෙන් දෙවතාවක්වත් අනිවාර්යයෙන්ම විදුලිය විසන්ධි වන බව පවසති. මීට අමතරව සුළු වැස්සක් හෝ සුළු සුළඟක් හැමූ සැණින් විදුලිය ඇනහිටින අතර, නඩත්තු කටයුතු (Maintenance) බව පවසමින් මාසයකට දිනක් හෝ දෙකක් උදේ 8 සිට සවස 5 දක්වා අඛණ්ඩව විදුලිය කපා හැරීම නිසා මාසයෙන් සැලකිය යුතු කාලයක් තමන් අඳුරේ ගත කරන බව ඔවුහු පෙන්වා දෙති. ඇතැම් අවස්ථාවලදී විදුලි උපකරණ පවා විනාශ වන අයුරින් අඩු වෝල්ටීයතා (Dim) තත්ත්වයන්ද පවතින බව වාර්තා වෙයි.
විදුලි පාරිභෝගිකයන් පෙන්වා දෙන්නේ ලංකා විදුලිබල මණ්ඩලයේ ක්ෂණික ඇමතුම් අංකය වන 1987 වෙත සිය දහස් වාරයක් දැනුම් දුන්නද ඉන් කිසිදු ස්ථාවර පිළිතුරක් හෝ විසඳුමක් නොලැබෙන බවයි. එමෙන්ම පේරාදෙණිය සහ පිළිමතලාව යන ප්රාදේශීය විදුලි ඉංජිනේරු කාර්යාලවල නිලධාරීන්ට ලිඛිතව සහ වාචිකව නැවත නැවතත් දැනුම් දුන්නද වගකීමක් ගැනීමට කිසිවෙකුත් ඉදිරිපත් වී නොමැත. මෙම අසාධාරණයට එරෙහිව ජනාධිපති ලේකම් කාර්යාලය, අගමැති කාර්යාලය, ලංකා විදුලිබල මණ්ඩල ප්රධාන කාර්යාලය (CEB Head Office), ශ්රී ලංකා මහජන උපයෝගිතා කොමිෂන් සභාව (PUCSL), බලශක්ති අමාත්යාංශය සහ රජයේ ඇමතිවරුන් කිහිපදෙනෙකුටම නිල වශයෙන් කරුණු ඉදිරිපත් කර ඇතත් මෙතෙක් කිසිදු පාර්ශවයකින් සහනදායී පිළිතුරක් ලැබී නොමැති බව ජනතාව පවසති. රාජ්ය කාර්යාලවල වගකිවයුතු නිලධාරීන්ගේ පවතින මෙම බිහිරි සහ අකාර්යක්ෂම පිළිවෙත නිසා, අවසාන විකල්පය ලෙස ෆේස්බුක් (Facebook) ඇතුළු සමාජ මාධ්ය හරහා හෝ මෙම පීඩාව ඉහළ බලධාරීන්ගේ ඇස ගැටෙන තෙක් මෙම සටහන උපරිමයෙන් Share කර සහයෝගය දක්වන ලෙස කුරුදුවත්ත ගම්වාසීහු සමස්ත ලංකාවාසී ජනතාවගෙන් බැගෑපත්ව ඉල්ලා සිටිති.
මුලාශ්ර – කඩුගන්නාව, හේනාවල පාරිභෝගික එකමුතුව
