පසුගිය කාලය පුරා ප්රමාණවත් බස් රථ නොමැතිකම සහ සේවක පුරප්පාඩු වැනි ගැටලු හේතුවෙන් අඩපණව පැවති කඩුවෙල ප්රදේශයේ ග්රාමීය මාර්ග රැසක පොදු ප්රවාහන සේවය යථා තත්ත්වයට පත් කරමින්, එම මාර්ග තුනක ලංගම බස් රථ ධාවනය අද (15) දින සිට යළි ආරම්භ කෙරිණි. නියෝජ්ය අමාත්ය කෞෂල්යා ආරියරත්න සහ පාර්ලිමේන්තු මන්ත්රී අසිත නිරෝෂණ යන මහජන නියෝජිතයින්ගේ ප්රධානත්වයෙන් සිදු කළ මෙම වැඩපිළිවෙල, එදිනෙදා ගමනාගමන අවශ්යතා ඉටු කරගන්නා සාමාන්ය ජනතාවට සහ පාසල් සිසුන්ට සහනයක් උදාකර දීමක් ලෙස සැලකිය හැකිය.
මෙහිදී 344 මාලඹේ සිට අතුරුගිරිය, 374 බත්තරමුල්ල සිට පැලවත්ත සහ 171-1 ආසිරි පෙදෙස සිට පිටකොටුව දක්වා වූ මාර්ගයන්හි බස් රථ ධාවනය යළි ආරම්භ වූ අතර, මෙය හුදෙක් බස් රථ ධාවනයට පමණක් සීමා නොවූ පුළුල් සංවර්ධන ව්යාපෘතියක ආරම්භයක් ලෙස දැක්විය හැකිය. තලංගම ඩිපෝව නවීන පහසුකම් සහිත මෙට්රෝ බස් ඩිපෝවක් ලෙස සංවර්ධනය කිරීම සඳහා රුපියල් මිලියන 1,100ක (රුපියල් ලක්ෂ එක්දහස් එකසීයයක්) දැවැන්ත ප්රතිපාදනයක් වෙන් කර ඇති බව පාර්ලිමේන්තු මන්ත්රී අසිත නිරෝෂණ මහතා මෙහිදී වැඩිදුරටත් සඳහන් කළේය.
ප්රවාහන ක්ෂේත්රයේ පවතින යටිතල පහසුකම් ගැටලු විසඳීම මගින් ජන ජීවිතය සක්රීය කිරීමට රජය ගෙන ඇති මෙම පියවර, ඉදිරියේදී දිවයින පුරා පවතින අනෙකුත් ග්රාමීය ප්රවාහන මාර්ගවලද ගුණාත්මක වෙනසක් ඇති කිරීම සඳහා ආදර්ශයක් වනු ඇත. මෙම සංවර්ධන කටයුතු හරහා ලංගම සේවාව වඩාත් කාර්යක්ෂම සහ විශ්වාසවන්ත සේවාවක් බවට පත් කිරීම අපේක්ෂාව වන අතර, එමගින් පොදු ප්රවාහනය භාවිත කරන ජනතාවගේ කාලය සහ ශ්රමය ඉතිරි කරමින් රටේ ආර්ථිකයට ධනාත්මක බලපෑමක් ඇති කරනු නොඅනුමානය.
