මහනුවර ඇසළ පෙරහර මංගල්යයේ අවසන් රන්දෝලි මහ පෙරහර අද (27) රාත්රී වීදි සංචාරය කිරීමට නියමිත අතර, පෙරහර නැරඹීම සඳහා පනවා ඇති ඇතැම් ස්ථානවල ආසන මිල රුපියල් 40,000ක් දක්වා ඉහළ ගොස් තිබේ.
ශ්රී දළදා මාලිගාව අභියසින් රාත්රී 6.43ට පිටත්වන අවසන් රන්දෝලි පෙරහර, දළදා වීදිය, යටිනුවර වීදිය, කන්දේ වීදිය සහ ඩී.එස්. සේනානායක වීදිය ඔස්සේ ගමන් කර රජ වීදියෙන් ඉහළට විත් ගෙවැදීමට නියමිතය. මෙහිදී සධාතුක කරඬුව වැඩමවන මංගල හස්ති රාජයා උඩුවියන් සහිතව පාවඩ මතින් ගමන් කිරීම විශේෂත්වයකි. මහනුවර මහ නගර සභාව මඟින් ක්වින්ස් කොරිඩෝවේ පනවා ඇති පළමු පෙළ ආසනයක මිල රුපියල් 28,000ක් වන අතර, එම ආසන සියල්ල මේ වන විට අලෙවි වී අවසන්ය. පෙරහර ආසන වැඩි මිලට අලෙවි කරන බවට තොරතුරු ලැබී ඇතත්, ඒ සඳහා මිල පාලනයක් කිරීමේ හැකියාවක් පෙරහර භාරයට නොමැති බවත්, ලබන වසරේ සිට එවැනි ක්රමවේදයක් හඳුන්වා දීමට කටයුතු කරන බවත් ගඟවට කෝරළය ප්රාදේශීය ලේකම් අමිල නවරත්න මහතා පැවසීය. මීට අමතරව, පෙරහර ගමන් කරන මාවත්වල ඉටි රෙදි එළා ඉඩ වෙන් කර ඒවා රුපියල් 3,000ත් 4,000ත් අතර මිල ගණන්වලට විකිණීමේ ජාවාරම් කිහිපයක් ද පොලිසියට වාර්තා වී තිබේ.
