ඇමරිකාවේ බ්රිතාන්ය තානාපතිවරයා ලෙස පීටර් මැන්ඩෙල්සන් (Peter Mandelson) පත් කිරීමේදී සිදුවූ බරපතළ ආරක්ෂක පරීක්ෂණ අතපසුවීම් සම්බන්ධයෙන් එල්ල වන චෝදනා හමුවේ බ්රිතාන්ය අගමැති කීර් ස්ටාමර් අද (අප්රේල් 20) පාර්ලිමේන්තුව හමුවේ කරුණු දැක්වීමට නියමිතය. 2024 වසරේ විශාල බහුතර බලයකින් ජයග්රහණය කළ ස්ටාමර්ගේ ජනප්රියත්වය මෙම මතභේදාත්මක සිදුවීමත් සමඟ දැඩි ලෙස පහත වැටී තිබේ.
ලිංගික අපරාධකරුවෙකු වූ ජෙෆ්රි එප්ස්ටයින් සමඟ පැවැති සමීප සබඳතා අනාවරණය වීම නිසා 72 හැවිරිදි මැන්ඩෙල්සන් පසුගිය වසරේ සැප්තැම්බර් මාසයේදී තානාපති ධුරයෙන් ඉවත් කරන ලදී. කෙසේ වෙතත්, මැන්ඩෙල්සන් පත් කිරීමට පෙර සිදු කළ ආරක්ෂක පරීක්ෂණයකින් (security vetting) ඔහු අසමත් වී ඇති බවට පසුගිය බ්රහස්පතින්දා අලුත් තොරතුරු අනාවරණය විය. සියලු විධිමත් ක්රියාපටිපාටීන් අනුගමනය කළ බව මීට පෙර පාර්ලිමේන්තුවට පැවසූ අගමැතිවරයාට මේ හේතුවෙන් දැඩි පීඩනයක් එල්ල වී ඇත.
මෙම ආරක්ෂක පරීක්ෂණය අසමත් වීම පිළිබඳව තමන්ට දැනුම් දී තිබුණේ පසුගිය සතියේදී පමණක් බවත්, එය “සමා කළ නොහැකි” වරදක් බවත් අගමැතිවරයා පවසයි. මෙම සිදුවීම හේතුවෙන් විදේශ අමාත්යාංශයේ ඉහළ නිලධාරියෙකු වන ඔලී රොබින්ස් (Olly Robbins) වහාම ධුරයෙන් ඉවත් කිරීමට ද අගමැතිවරයා පියවර ගෙන ඇත. අද දිනයේදී අදාළ සිදුවීමට අදාළ කරුණු පාර්ලිමේන්තුවට ඉදිරිපත් කරන බව පැවසූ අගමැති ස්ටාමර්ට, විපක්ෂයෙන් ඉල්ලා අස්වන ලෙසට බලපෑම් එල්ල වෙමින් පවතී.
