බ්රිතාන්ය අගමැති කීර් ස්ටාර්මර් මහතාට සිය ධුරයෙන් ඉල්ලා අස්වන ලෙස එල්ල වන දැඩි බලපෑම් හමුවේ ඔහු එම ඉල්ලීම් ප්රතික්ෂේප කරමින් රටේ ප්රතිසංස්කරණ කටයුතු සමඟ ඉදිරියට යන බවට පොරොන්දු වී තිබේ. පසුගිය සතියේ පැවැති පළාත් පාලන මැතිවරණයේදී ලේබර් පක්ෂය ලැබූ දරුණු පරාජය හේතුවෙන් පක්ෂයේ මන්ත්රීවරුන් 90ක පමණ පිරිසක් ඔහුට ඉල්ලා අස්වන ලෙස බලපෑම් කරමින් සිටිති.
තමා ධුරයෙන් ඉවත් වුවහොත් රට තුළ අවුල් සහගත තත්ත්වයක් ඇති විය හැකි බවට ස්ටාර්මර් මහතා අනතුරු අඟවා ඇත. 2024 වසරේ ලැබූ විශාල මැතිවරණ ජයග්රහණයෙන් පසු නිසි ප්රතිසංස්කරණ සිදු කිරීමට ඔහු අපොහොසත් වී ඇති බවට චෝදනා එල්ල වේ.
අගමැතිවරයාගේ නායකත්වයට අභියෝග කළ හැකි ප්රධාන ප්රතිවාදියෙකු ලෙස සැලකෙන සෞඛ්ය අමාත්ය වෙස් ස්ට්රීටිං මහතා අද පෙරවරුවේ ස්ටාර්මර් මහතා සමඟ ඩවුනිං වීදියේදී විශේෂ සාකච්ඡාවක නිරත වී තිබේ. මෙම හමුව බ්රිතාන්ය මාධ්ය විසින් තීරණාත්මක සාකච්ඡාවක් ලෙස හඳුන්වා දී ඇතත්, විනාඩි 20කට අඩු කාලයකින් එය අවසන් වී ඇති බව වාර්තා වේ.
තවමත් කිසිදු අපේක්ෂකයෙකුට නායකත්ව අභියෝගයක් එල්ල කිරීමට තරම් ප්රමාණවත් මන්ත්රීවරුන් සංඛ්යාවකගේ සහාය ලැබී නොමැති බව ස්ටාර්මර් මහතාගේ සමීපතමයෙකු වන යුරෝපා අමාත්ය නික් තෝමස්-සයිමන්ඩ්ස් මහතා ප්රකාශ කර ඇත. මේ අතර තුන්වැනි චාල්ස් රජු විසින් මෙහෙයවනු ලබන පාර්ලිමේන්තුව විවෘත කිරීමේ රාජ්ය උත්සවය සඳහා මේ වන විට කටයුතු සූදානම් වෙමින් පවතින අතර එහිදී රජය විසින් සකස් කරන ලද ව්යවස්ථාදායක සැලසුම් රජු විසින් ඉදිරිපත් කිරීමට නියමිතය.
