කිලිනොච්චිය, අක්කරායන්කුලම් පොලිස් බලප්රදේශයට අයත් පලෙයි රක්ෂිතය තුළ එල්ටීටීඊ සංවිධානයට අයත් පුහුණු කඳවුරක් සහ බෝම්බ නිෂ්පාදනාගාරයක් පවත්වාගෙන යන බවට අසත්ය ප්රචාරය කළ බව කියන සැකකරුවෙකු සැප්තැම්බර් 02 වැනිදා දක්වා රක්ෂිත බන්ධනාගාරගත කිරීමට කොටුව මහේස්ත්රාත් පසන් අමරසේන මහතා නියෝග කළේය. ත්රස්ත මර්දන හා විමර්ශන කොට්ඨාසය මගින් අත්අඩංගුවට ගෙන මෙලෙස රක්ෂිත බන්ධනාගාරගත කෙරුණේ බොරලැස්ගමුව, බෙල්ලන්විල ප්රදේශයේ පදිංචි 46 හැවිරිදි රඹුකේවෙල අධිකාරිගේ සංගීත් ජයසේකර නැමැති අයෙකි.
සැකකරු අන්තර් මහාද්වීපික මානව හිමිකම් සංවිධානයේ විධායක අධ්යක්ෂවරයා ලෙස පෙනී සිටිමින් මාධ්ය හමුවක් පවත්වා මෙම තහවුරු නොකළ තොරතුරු සමාජ මාධ්ය වෙත මුදාහැර ඇති බව පොලිසිය අධිකරණයට වාර්තා කර ඇත. සිද්ධියට අදාළව මාධ්ය හමුව විකාශය කළ ප්රධාන මාධ්ය නාලිකාවල සංස්කරණය නොකළ වීඩියෝ දර්ශන පරීක්ෂණ සඳහා අපරාධ පරීක්ෂණ දෙපාර්තමේන්තුව වෙත ලබාදෙන ලෙස මහේස්ත්රාත්වරයා නියෝග කළේය.
මෙම ප්රකාශය සම්බන්ධයෙන් කරුණු දැක්වූ රජය, අදාළ ප්රදේශයේ සිදුවී ඇත්තේ නීතිවිරෝධී ලෙස වනාන්තරය හෙළිපෙහෙළි කර පවත්වාගෙන ගිය ගොවිපොළකට සහ ඉදිකිරීම් කිහිපයකට එරෙහිව වන සංරක්ෂණ දෙපාර්තමේන්තුව විසින් නඩු පවරා තිබීමක් බවත්, එහි කිසිදු ත්රස්තවාදී කඳවුරක් නොමැති බවත් තහවුරු කර තිබේ. ජාතීන් අතර අසමගිය ඇතිවන ආකාරයේ බරපතළ අසත්ය ප්රකාශයක් කිරීම සම්බන්ධයෙන් වැඩිදුර විමර්ශන ක්රියාත්මක වේ.
