ශ්රී ලංකාවේ අද්විතීය ජෛව විවිධත්වය සහ සංවේදී සාගර පරිසර පද්ධති ඉලක්ක කරගනිමින් ක්රියාත්මක වන නීති විරෝධී ජාවාරම් මෙරට පාරිසරික පැවැත්ම මෙන්ම ජාතික ආරක්ෂාව ද බරපතළ තර්ජනයකට ලක් කරමින් තිබේ. ශ්රී ලංකා ගුවන් හමුදාවට ලැබුණු විශේෂ බුද්ධි තොරතුරක් රිටිගල තොරතුරු හා පර්යේෂණ මධ්යස්ථානය වෙත ලබාදීමෙන් අනතුරුව ක්රියාත්මක වූ වනජීවී නිලධාරීන්, කිරිබත්ගොඩ සහ රාගම ප්රදේශ කේන්ද්ර කරගනිමින් පසුගිය ජූලි 3 වනදා දැවැන්ත ඒකාබද්ධ වැටලීමක් දියත් කර ඇත. එහිදී කිලෝග්රෑම් 32ක් බරැති අතිශය දුර්ලභ කොරල් පරයක් සහ ව්යාඝ්ර දතක් ඇතුළු ආරක්ෂිත වනජීවී සත්ව කොටස් රැසක් සන්තකයේ තබාගෙන සිටි සැකකරුවන් දෙදෙනෙකු නීතියේ රැහැනට හසුකර ගැනීමට හැකිව තිබේ.
මෙම සාර්ථක වැටලීමේදී රාජ්ය භාරයට ගන්නා ලද සත්ව කොටස් අතර කිලෝග්රෑම් 32ක කොරල් පරයට අමතරව, වඳවීමේ තර්ජනයට ලක්ව ඇති ඉතා දුර්ලභ ගණයේ බෙල්ලන් විශේෂ වන ශ්රී ලංකා හෝන්ඩ් හෙල්මට් බෙල්ලෙකු (Catadontus marianus), යක්ෂ බෙල්ලෙකු (Spider conch) මෙන්ම මෙරට පරිසර පද්ධතියට අයත් නොවන ව්යාඝ්ර දතක් සහ තවත් හඳුනා නොගත් සාගර ජීවියෙකුගේ ශරීර කොටසක් ද අතුළත් වේ. මෙලෙස අත්අඩංගුවට පත්ව ඇත්තේ වයස අවුරුදු 20 සහ 26 යන වයස් කාණ්ඩවල පසුවන තරුණයන් දෙදෙනෙකු වන අතර, වර්තමානයේ තරුණ පරපුර මෙවැනි සංවිධානාත්මක පාරිසරික අපරාධ කෙරෙහි යොමුවීමේ ප්රවණතාව මෙමඟින් පැහැදිලි වෙයි. සැකකරුවන් දෙදෙනා රුපියල් ලක්ෂය බැගින් වූ වනජීවී ඇප මත මුදා හැර ඇති අතර, ඉදිරි දිනයකදී ඔවුන් මහර සහ වැලිසර මහේස්ත්රාත් අධිකරණ වෙත ඉදිරිපත් කිරීමට නියමිතව ඇත.
වනසත්ව හා වෘක්ෂලතා ආරක්ෂණ ආඥාපනතේ දැඩි ප්රතිපාදනවලට අනුව, කොරල්පර සහ අනෙකුත් ආරක්ෂිත වනජීවී කොටස් එකතු කිරීම, සන්තකයේ තබා ගැනීම, ප්රවාහනය කිරීම හෝ ඒවායේ වෙළඳාම් කිරීම සපුරා තහනම් වන අතර, එවැනි වැරදි සම්බන්ධයෙන් වරදකරුවන් වන පුද්ගලයන්ට දැඩි බරපතළ වැඩ සහිත සිරදඬුවම් සහ දඩ පැනවිය හැකි බව වනජීවී සංරක්ෂණ දෙපාර්තමේන්තුව සිහිපත් කරයි. සාගර පද්ධතියේ සමතුලිතතාව රඳා පවතින කොරල්පර සහ දුර්ලභ ජීවීන් විනාශ කිරීම රටේ සංචාරක කර්මාන්තයට මෙන්ම සමුද්රීය ආර්ථිකයට ද දිගුකාලීන වශයෙන් බලපාන බරපතළ ඛේදවාචකයකි. ඉදිරියේදී මෙවැනි විනාශකාරී ජාලයන් මුළුමනින්ම මුලිනුපුටා දැමීම සඳහා ආරක්ෂක අංශ සහ වනජීවී බලධාරීන් ඒකාබද්ධව වඩාත් දැඩි නීතිමය මෙන්ම සෝදිසි මෙහෙයුම් යාන්ත්රණයක් ක්රියාවට නැංවීම අත්යවශ්ය සාධකයකි.
