කුරුණෑගල, උඩවල්පොල ප්රදේශයේ සිව්මහල් නිවාස සංකීර්ණයකින් බිමට පැන 16 හැවිරිදි පාසල් සිසුවෙකු සිය දිවි හානිකර ගැනීමේ පුවතක් පසුගිය සිකුරාදා (08) අලුයම වාර්තා විය. ජාත්යන්තර පාසලක අධ්යාපනය ලැබූ මෙම සිසුවා, මියයන අවස්ථාවේදී සියදිවි නසා ගැනීමට පෙළඹවීම් කරන අන්තර්ජාල ක්රීඩාවක (Online Game) නිරතව සිට ඇති බව මූලික විමර්ශනවලදී අනාවරණය වී තිබේ. කුරුණෑගල වැඩබලන මහෙස්ත්රාත් ආචාර්ය ෆිලිෂියන් පෙරේරා මහතා විසින් සිද්ධිය වූ ස්ථානය නිරීක්ෂණය කරන ලදී.
සිසුවා පැන ඇති බවට සැලකෙන ඉහළ මහල පරීක්ෂා කිරීමේදී ඔහුගේ පාවහන් යුගළ පිළිවෙළට තබා තිබියදී සොයාගෙන ඇති අතර, ඔහු භාවිතා කළ ජංගම දුරකථනය ද එම ස්ථානයේ තිබී හමුවී ඇත. එම අවස්ථාවේදීත් දුරකථනයේ අන්තර්ජාල ක්රීඩාවක් ක්රියාත්මක වෙමින් තිබූ බව පොලිස් පරීක්ෂණවලදී තහවුරු විය. දරුවන් අන්තර්ජාලය සහ ජංගම දුරකථන භාවිත කිරීමේදී දෙමාපියන් මීට වඩා අවධානයෙන් පසුවිය යුතු බව මෙම ඛේදනීය සිදුවීමෙන් නැවතත් සිහිපත් කෙරේ. සිද්ධිය සම්බන්ධයෙන් කුරුණෑගල මූලස්ථාන පොලිසිය වැඩිදුර විමර්ශන මෙහෙයවනු ලබයි.
