ලංකා ප්රිමියර් ලීග් (LPL) 2026 තරගාවලිය සඳහා හඳුන්වා දුන් නව ‘ඉම්පැක්ට් ප්ලේයර්’ (Impact Player) නීතිය මේ වන විට දැඩි විවේචනයට ලක්ව තිබේ. තරගයකදී කණ්ඩායමකට ක්රීඩා කළ හැකි විදෙස් ක්රීඩකයින් සංඛ්යාව හතරකට සීමා වී තිබුණද, මෙම නව නීතියේ ඇති හිඩැසක් හේතුවෙන් කණ්ඩායම් පහක් දක්වා විදෙස් ක්රීඩකයින් භාවිත කරන ආකාරය දැකගත හැකි වී ඇත.
මෙම නීතිය හඳුන්වා දීමේ අරමුණ වූයේ තරගවලට උපායශීලී බවක් එක් කිරීම සහ දේශීය ක්රීඩකයින්ට වැඩි අවස්ථා ලබා දීමයි. කෙසේ වෙතත්, තරගාවලියේ පළමු තරග තුනේදීම සිදු වූයේ මීට ප්රතිවිරුද්ධ දෙයකි. දඹුල්ල සහ කොළඹ කණ්ඩායම් විසින් තම ඉම්පැක්ට් ප්ලේයර් ලෙස විදෙස් ක්රීඩකයෙකු යොදා ගැනීම නිසා එකම තරගයකදී විදෙස් ක්රීඩකයින් පස් දෙනෙකු සහභාගී කරවා ගැනීමට එම කණ්ඩායම්වලට හැකි විය.
ඉන්දීය ප්රිමියර් ලීගයේ (IPL) මෙම නීතිය ක්රියාත්මක වන විට, කණ්ඩායමක සිටින විදෙස් ක්රීඩකයින් සංඛ්යාව හතර ඉක්මවිය නොහැකි බවට පැහැදිලි නීතියක් ඇත. එහෙත් LPL තරග කොන්දේසිවලට අනුව, පිටියේ සිටිය හැකි විදෙස් ක්රීඩකයින් සංඛ්යාව හතරක් ලෙස සඳහන් වුවද, විදෙස් ක්රීඩකයෙකු ඉම්පැක්ට් ප්ලේයර් ලෙස යොදා ගැනීම තහනම් කරන විශේෂිත නීතියක් නොමැත.
මෙය නීතියේ පවතින හිඩැසක් ලෙස කණ්ඩායම් පුහුණුකරුවෝ පෙන්වා දෙති. කණ්ඩායම් මේ වන විට සිදු කරන්නේ පවතින නීති රාමුව තුළ උපරිම වාසිය ලබා ගැනීම වුවත්, දේශීය ක්රීඩකයින්ට අවස්ථා ලබා දීමේ මූලික අරමුණ ඉටු වේද යන්න ගැටලුවකි.
තරගාවලි සංවිධායකයින් විසින් මෙම නීතිය සම්බන්ධයෙන් පැහැදිලි කිරීමක් සිදු නොකරන්නේ නම්, ඉදිරියේදීත් මෙම තත්ත්වය අඛණ්ඩව සිදුවනු ඇති බවට මත පළ වේ.
