යල මහ දෙකන්නයම සාර්ථකව වගා කිරීමේ ගල්ගමුව ගොවි ජනතාවගේ බලාපොරොත්තු මල්ඵලගන්වමින් මහගල්ගමුව පෝෂිත ඇළ ව්යාපෘතියේ දෙවන අදියර ඊයේ (25) දින මහගල්ගමුව වැව් තාවුල්ලේදී ආරම්භ කරන ලදී. කෘෂිකර්ම, පශු සම්පත්, ඉඩම් හා වාරිමාර්ග අමාත්යාංශය යටතේ වාරිමාර්ග දෙපාර්තමේන්තුව මගින් සමස්ත පිරිවැය රුපියල් මිලියන 254ක් වැය කරමින් මෙම ව්යාපෘතිය ක්රියාත්මක කරනු ලබයි.
ගල්ගමුව ගොවීන්ට ජලය නොමැතිකම හේතුවෙන් එක් කන්නයක් පමණක් වගා කළ යුගය අවසන් කරමින් ජල ගැටලුවට ස්ථිර විසඳුමක් ලබා දීම සඳහා මෙම ව්යාපෘතිය ආරම්භ කර ඇත. මහගල්ගමුව ජලාශයේ මුළු ධාරිතාව අක්කර අඩි 6,500ක් වුවද, ජලපෝෂක ප්රදේශයෙන් ලැබෙන ජල ප්රමාණය ප්රමාණවත් නොවීම නිසා පූර්ණ ජල මට්ටමට ළඟාවීමට නොහැකිව පවතී. මෙම වැව පෝෂණය කිරීම මඟින්, ආරම්භයේ සිටම ජල හිඟයකින් පෙළෙන පාලුකඩවල යෝජනා ක්රමයේ II අදියර යටතේ ඇති කුඹුරු අක්කර 800කට වාරි ජලය සැපයීමට හැකියාව ලැබෙන අතර, සමස්තයක් ලෙස ව්යාපෘතියෙන් පසු වගාබිම් අක්කර 1,400කට ආසන්න ප්රමාණයක් යල මහ කන්න දෙක සඳහාම වාරි ජලය සැපයීමට අවස්ථාව සැලසේ.
මෙම අවස්ථාවට එක්වෙමින් කෘෂිකර්ම හා පශු සම්පත් නියෝජ්ය අමාත්ය නාමල් කරුණාරත්න මහතා සඳහන් කළේ මෙම වාරි ව්යාපෘතිය මඟින් ප්රදේශයේ ගොවි ජනතාව මුහුණ දෙන දැවෙන ජල ප්රශ්නයට ස්ථිර විසඳුමක් ලැබෙන බවයි. මීට පෙර පැවති ව්යාපෘතියේ දූෂිත තත්ත්වයන් හේතුවෙන් විශාල මුදලක් අපතේ ගොස් ඇති බව විගණන වාර්තාවලින් හෙළි වී ඇති හෙයින්, කැබිනට් අනුමැතිය හරහා නව ව්යාපෘතියක් ලෙස මෙය ක්රියාත්මක කරන බවත්, 2027 එළඹෙන මහ කන්නය වන විට ගොවීන්ගේ කුඹුරුවලට වතුර ලබා දීමට හැකි වනු ඇතැයි විශ්වාස කරන බවත් අමාත්යවරයා පැවසීය.
මෙම ආරම්භක අවස්ථාව සඳහා මහජන ආරක්ෂක හා පාර්ලිමේන්තු කටයුතු අමාත්ය ආනන්ද විජේපාල මහතා, කෘෂිකර්ම හා පශු සම්පත් නියෝජ්ය අමාත්ය නාමල් කරුණාරත්න මහතා, කුරුණෑගල දිස්ත්රික් පාර්ලිමේන්තු මන්ත්රී චන්දන තෙන්නකෝන් මහතා ඇතුළු රාජ්ය නිලධාරීන්, ගොවි සංවිධාන නියෝජිතයන් සහ ප්රදේශවාසීන් විශාල පිරිසක් එක්ව සිටියහ.
