මහරගම අධ්යාපන කොට්ඨාසයේ ප්රමුඛතම 1AB පාසලක් වන මහාමායා බාලිකා විද්යාලයේ දශක ගණනාවක අධ්යාපනික හා ක්රීඩා කීර්තිනාමය බරපතළ තර්ජනයකට ලක්ව ඇති බවට තොරතුරු වාර්තා වේ. මින් පෙර පාසලේ පාලනය හෙබවූ විදුහල්පතිනියකගේ අත්තනෝමතික ක්රියාකලාපය හේතුවෙන් 2022 වසරේ සිට පාසලේ සමස්ත ප්රගමනය ඇද වැටුණු බවත්, විභාග ප්රතිඵල කලාපයේ මුල් දස දෙනා අතර සිට 24 වන ස්ථානය දක්වා පසුබෑමට ලක්වූ බවත් අනාවරණය වේ. මෙම තත්ත්වය හුදෙක් පරිපාලන ගැටලුවක් නොව, දහස් සංඛ්යාත සිසුවියන්ගේ අනාගතය හා සම්බන්ධ බරපතළ සමාජීය අර්බුදයක් ලෙස විද්වතුන් හඳුනාගෙන තිබේ.
විශේෂයෙන්ම රුපියල් ලක්ෂ විස්සකට අධික මහජන මුදල් අවභාවිත කරමින් සිදු කළ අලුත්වැඩියාවන්, ක්රීඩා සහ සංගීත කටයුතු සඳහා දෙමාපියන්ගෙන් අවිධිමත් ලෙස මුදල් එකතු කිරීම සහ පාසල් දේපළ පෞද්ගලික පරිහරණයට යොදා ගැනීම පිළිබඳව දරුණු චෝදනා එල්ල වී ඇත. එමෙන්ම පාසල් කාලය තුළ දරුවන් සූදු ක්රීඩාවලට සමාන ක්රියාකාරකම්වලට යොමු කරමින් මානසික පීඩනයට ලක් කිරීම හරහා සිසුන්ගේ මනෝවිද්යාත්මක වර්ධනයට එල්ල වූ බලපෑම සුළුපටු නොවේ. මෙවැනි පසුබිමක් තුළ දක්ෂ ගුරුවරුන් පාසල හැර යාමත්, උසස් පෙළ වැනි තීරණාත්මක අංශවල සිසුන් ලියාපදිංචි වීම සියයට හැත්තෑවකට වඩා වැඩි ප්රමාණයකින් පහත වැටීමත් හරහා විද්යාලයේ පැවැත්මම අස්ථාවර වී තිබේ.
මෑතකදී පත් වූ නව විදුහල්පතිවරයා යටතේ පාසල නැවතත් ක්රීඩා, බාලදක්ෂ සහ අධ්යාපනික වශයෙන් නව පිබිදීමක් ලබමින් තිබූ අවධියක, යළිත් චෝදනා ලත් හිටපු විදුහල්පතිනියම පත් කර එවීම පිළිබඳව දෙමාපියන් සහ ආදි ශිෂ්යාවන් සිය දැඩි විරෝධය පළ කරති. දූෂණ සහ අක්රමිකතා රාශියක් මධ්යයේ සිදුවන මෙම නැවත පත් කිරීම, සමස්ත පළාත් අධ්යාපන පද්ධතියේම විනිවිදභාවය ප්රශ්න කරන්නක් බවට පත්ව ඇත. මේ සම්බන්ධයෙන් බලධාරීන් වහාම මැදිහත් වී සාධාරණ පරීක්ෂණයක් පවත්වා, පාසලේ ගෞරවය සහ දරුවන්ගේ අයිතිවාසිකම් සුරක්ෂිත කරනු ඇතැයි සමස්ත ප්රජාවම බලාපොරොත්තු වේ.
