ශ්රී ලංකාවේ පොදු ප්රවාහන සේවාව යටිතල පහසුකම් හා තාක්ෂණික අතින් නූතනකරණය කිරීමේ පූර්ණ පරිවර්තනීය පියවරක් තබමින්, මාකුඹුර බහුමාධ්ය ප්රවාහන මධ්යස්ථානයේ නිල වෙබ් අඩවිය අද දින නිල වශයෙන් දියත් කිරීමට ප්රවාහන නියෝජ්ය අමාත්ය ප්රසන්න ගුණසේන මහතා කටයුතු කළේය. දිවයින පුරා මගී ජනතාවට බස් සහ දුම්රිය කාලසටහන් මෙන්ම සියලුම බහුමාධ්ය ප්රවාහන මධ්යස්ථාන පිළිබඳ සප්රමාණික තොරතුරු එකම ඩිජිටල් අවකාශයකින් ලබාගැනීමට මෙමගින් මඟපෑදෙන අතර, එය රටේ සාම්ප්රදායික ප්රවාහන පද්ධතිය ඩිජිටල්කරණය වෙත ගෙනයාමේ දැවැන්ත ජාතික මට්ටමේ සංධිස්ථානයක් ලෙස සැලකේ.
මෙම නව ඩිජිටල් පිවිසුමේ වඩාත්ම සුවිශේෂී සහ මූලෝපායික මෙවලම වන්නේ කෘත්රිම බුද්ධි (AI) තාක්ෂණය පදනම් කරගනිමින් හඳුන්වා දී ඇති “MAKU” නමැති අතථ්ය මගී සහායකයා (Passenger Assistant) වේ. මගීන්ට අවශ්ය ගමනාන්ත, බස් හා දුම්රිය වේලාවන් සහ විකල්ප ගමන් මාර්ග පිළිබඳ ක්ෂණිකව හා නිරවද්යව තොරතුරු සපයන මෙම තාක්ෂණික පද්ධතිය, මගී අත්දැකීම ඉහළ නැංවීම උදෙසා රජය ක්රියාත්මක කරන පුළුල් ප්රවාහන යටිතල පහසුකම් උපායමාර්ගයේ සෘජු ප්රතිඵලයකි. නාගරික තදබදය අවම කරමින් හා කාර්යක්ෂමතාව තහවුරු කරමින් පොදු ප්රවාහනය වෙත ජනතාව වැඩිවශයෙන් ආකර්ෂණය කරගැනීමට මෙවැනි නවීන තාක්ෂණික යෙදවුම් පිටිවහලක් වන බව නියෝජ්ය අමාත්යවරයා එහිදී පෙන්වා දුන්නේය.
මගී සේවාවන්ට අමතරව බස් පර්යන්ත සහ රථවාහන කළමනාකරණය විධිමත් කිරීම සඳහා වන නවීන පද්ධතියක් කෙරෙහි ද මෙහිදී විශේෂ අවධානය යොමු වූ අතර, ඊළඟ අදියර ලෙස බස් රථවල ගමන්මඟ තත්ය කාලීනව (Real-time tracking) නිරීක්ෂණය කිරීමේ GPS තාක්ෂණික පද්ධතිය ඊට අනුකලනය කිරීමට නියමිතය. මෙම තාක්ෂණික හා යටිතල පහසුකම් නවීකරණය ඉදිරියේදී දිවයිනේ සසුදුසු අනෙකුත් ප්රවාහන මධ්යස්ථාන වෙත ද ව්යාප්ත කිරීම තුළින් පරිපූර්ණ, කාර්යක්ෂම සහ ජාත්යන්තර මට්ටමේ ඩිජිටල් ප්රවාහන ජාලයක් ශ්රී ලංකාව තුළ ස්ථාපිත කිරීමට ප්රවාහන අමාත්යාංශය අපේක්ෂා කරයි.
