දිවයිනේ ප්රදේශ කිහිපයකට අද (09) දිනයේත් විටින් විට වැසි හෝ ගිගුරුම් සහිත වැසි මෙන්ම තද සුළං ඇති විය හැකි බව කාලගුණවිද්යා දෙපාර්තමේන්තුව නිවේදනය කරයි.
ඒ අනුව බස්නාහිර, සබරගමුව සහ වයඹ පළාත්වලත් ගාල්ල, මාතර, මහනුවර සහ නුවරඑළිය දිස්ත්රික්කවලත් විටින් විට වැසි හෝ ගිගුරුම් සහිත වැසි ඇති වන අතර, අනුරාධපුර සහ හම්බන්තොට දිස්ත්රික්කවල වැසි ස්වල්පයක් ඇතිවිය හැකි බව එම දෙපාර්තමේන්තුව පෙන්වා දෙයි.
සුළං තත්ත්වය සහ පවතින අවදානම පිළිබඳව අදහස් දක්වමින් කාලගුණවිද්යා දෙපාර්තමේන්තු නිලධාරීන් මෙසේ ජනතාව දැනුවත් කළහ.
“මධ්යම කඳුකරයේ බටහිර බෑවුම් ප්රදේශවලත්, උතුරු සහ උතුරු-මැද පළාත්වලත් හම්බන්තොට සහ ත්රිකුණාමලය දිස්ත්රික්කවලත් විටින් විට හමන පැයට කිලෝමීටර් 40ත් 50ත් අතර තද සුළං ඇති විය හැකියි. සෙසු ප්රදේශවල ද විටින් විට හමන පැයට කිලෝමීටර් 30ත් 40ත් පමණ තරමක තද සුළං බලාපොරොත්තු විය හැකියි. එබැවින් ගිගුරුම් සහිත වැසි සමඟ ඇතිවිය හැකි තාවකාලික තද සුළංවලින් සහ අකුණු මඟින් සිදුවන අනතුරු අවම කර ගැනීමට අවශ්ය පියවර ගන්නා ලෙස අප මහජනතාවගෙන් කාරුණිකව ඉල්ලා සිටිනවා.”
පවතින වැසි සහිත කාලගුණික තත්ත්වය හේතුවෙන් ගිගුරුම් සහිත වැසි පවතින අවස්ථාවලදී විවෘත ස්ථානවල හෝ ගස් යට රැඳී සිටීමෙන් වළකින ලෙසත්, විදුලි උපකරණ භාවිතයේදී වඩාත් සැලකිලිමත් වන ලෙසත් ආරක්ෂක අංශ ද මහජනතාවට දැනුම් දෙයි.
