2026 පොදුරාජ්ය මණ්ඩලීය ක්රීඩා උළෙලේ පිරිමි හෙල්ල විසිකිරීමේ ඉසව්වේ රන් පදක්කම දිනාගැනීමට ශ්රී ලංකාවේ 23 හැවිරිදි රුමේෂ් තරංග පතිරගේ සමත් විය. ස්කොට්ලන්තයේ ස්කොට්ස්ටවුන් ක්රීඩාංගණයේදී පැවති මෙම තරගය මෙරට වේලාවෙන් අද (01) උදෑසන අවසන් විය.මෙහිදී රුමේෂ් සිය දෙවන උත්සාහයේදී මීටර් 89.75ක දුරක් විසි කරමින් මෙම සුවිශේෂී රන් පදක්කම මව්බිමට දිනාදුන්නේය. මෙය පොදුරාජ්ය මණ්ඩලීය ක්රීඩා උළෙලක ශ්රී ලංකාව දිනූ 6 වැනි රන් පදක්කම වන අතර, 2006 වසරේදී බර ඉසිලීමේ ක්රීඩක චින්තන විදානගේ දිනූ රන් පදක්කමෙන් වසර 20කට පසු දිනූ පළමු රන් පදක්කමද වේ.
මෙහිදී රුමේෂ්ට යම් අභියෝගයක් විය හැකියැයි අනුමාන කර තිබූ 2021 ඔලිම්පික් රන් පදක්කම්ලාභී නීරාජ් චොප්රාට මීටර 85.83ක දුරක් විසි කරමින් රිදී පදක්කමෙන් සෑහීමට සිදුවූ අතර, තවත් ඉන්දියානුවෙකු වන යෂ් වීර් සිං මීටර 85.41ක දක්ෂතාවක් දක්වමින් ලෝකඩ පදක්කම දිනාගත්තේය. මෙම රන් පදක්කමත් සමඟ මෙවර ක්රීඩා උළෙලේ ශ්රී ලංකාව දිනූ මුළු පදක්කම් සංඛ්යාව 2ක් දක්වා ඉහළ ගොස් තිබේ. පසුගිය බ්රහස්පතින්දා පැවති පැරා කවපෙත්ත විසිකිරීම (F42-44/F61-64) ඉසව්වෙන් රිදී පදක්කමක් දිනාගැනීමට පාලිත බණ්ඩාර සමත් විය.
