අලුතින් ආරම්භ කරන ලද මෙට්රෝ බස් සේවාව පිළිබඳව අදහස් දක්වන මගීන් පවසන්නේ එහි පවතින කළමනාකරණ දුර්වලතා හේතුවෙන් සේවාව අසාර්ථක වීමේ අවදානමක් පවතින බවයි. මාකුඹුර බහුවිධ ප්රවාහන මධ්යස්ථානයේ සිට කොටුව දක්වා ධාවනය වූ බස් රථයක මුළු ගමනටම සිට ඇත්තේ මගීන් පස් දෙනෙකු පමණක් බව වාර්තා වේ. බස් රථයේ පිරිසිදුකම, සැපපහසුව සහ කාර්ය මණ්ඩලයේ සුහදශීලී බව අගය කළ හැකි මට්ටමක පැවතියද ප්රායෝගික ගැටලු රැසක් නිසා මගීන් මෙම සේවාවෙන් ඈත් වී සිටින බව නිරීක්ෂණය වී ඇත.
ප්රධානතම ගැටලුව ලෙස පෙන්වා දී ඇත්තේ මාකුඹුරේ සිට කොටුවටම ලබා දී ඇති සීමිත බස් නැවතුම් සංඛ්යාවයි. මාර්ගය දෙපස මගීන් අත දැමුවද බස් රථය නතර නොකිරීමත්, අවශ්ය තැන්වලින් බැසීමට අවස්ථාව නොලැබීමත් නිසා ජනතාව මෙයට ගොඩවීමට මැලි වෙති. එසේම බස් රථයේ 120 මාර්ග අංකය ප්රදර්ශනය කළද එය එම මාර්ගයේ ගමන් නොකිරීමත්, රියදුරන් නිසි මාර්ගය පිළිබඳව දැනුවත් නොවීමත් මගීන් දැඩි අපහසුතාවයට පත් කරන්නකි.
තාක්ෂණික අංශයෙන්ද මෙම සේවාව තවමත් පවතින්නේ පසුගාමී මට්ටමකයි. බස් රථය තුළ තිබිය යුතු ස්වයංක්රීය ස්ථාන නිවේදන පද්ධතිය තවමත් ක්රියාත්මක නොවන අතර විකල්ප මාර්ග ඔස්සේ ගමන් කිරීමට සිදුවීම නිසා මගීන්ගේ කාලයද අපතේ යන බව වාර්තා වේ. මෙම අඩුපාඩු කඩිනමින් නිවැරදි කර නිසි ක්රමවේදයකට සේවාව පවත්වාගෙන නොගියහොත් ඉදිරියේදී මෙය විශාල මූල්ය පාඩුවක් ලබන ව්යාපෘතියක් වනු ඇති බව මගීන් වැඩිදුරටත් සඳහන් කරයි.
